كرانة يأفلاطون=لو هي عاشت أيّامك
الوحيد انته بزمانه كان=تتحقق لك أحلامك

لْمدينه الفاضلة تدعو=ودعوى الكل تقبّلها
وهالقرية من الفردوس=الله بفضله أنزلها
ومافي بقعة في الدّنيا=على كرانة فضّلها
لا مكة ولا لطفوف=گِـدرتْ تكفل أقلامك

مكة اشفيها حگ تفخر=فيها بس گبور أصحاب
نزل لكتاب مو فيها=في كرانة نزل لكتاب
وفي كرانة خلف چبدي=حگ المنتظر نوّاب
وانته سيّد الأفكار=وهِل كرّانة خدّامك

ثق فينا يأفلاطون=ولا تحاتي ولا تهتم
فينا عيسى والإنجيل=وفينا المائدة ومريم
وجذع النخلة كل إثنين=إهِزّونه ورُطب ينلم
في كرانة تعال اسكن=وسكون اتعيش أيامك

منها مبتدى الإسراء=وفيها منتهى لعروج
و زبرها ردِم ذو القرنين=يبني السّد على يأجوج
نفخ فيها وجعلها نار=وبعضها في بعضها تموج
وأقوامه في ديرتنا=يأفلاطون أقوامك

(كاف را ألف نون هاء)=كرانة هدى وبشرى
عليك أتلو نبأ خمسة=كاف الكسّرت كسرى
و راء الردّت اليعقوب=يوسف وانكشف ضرّه
وألف أفكار ونون النور=وهاء العالية هامك

من كان البحر ممدود=و كرانة إليه المـَـد
لو باب السما مردود=باب الديرة ما ينرد
ولو تنفد لغة لاعجاز=لغة كرانة ما تنفد
اعتبرها درعك وغمدك=وقـَـر عين اعلى صمصامك

في ديرتنا يأفلاطون=تعال إنصب إلك خيمة
وأفكارك عشان تصير=هامور افلِت الجيمة
منها انسوّي لك أفلام=ونعرضها على السّيما
يا عالم ثق ابأعلام=إتصوّت لأفلامك

على كرانه واويلي =واويلي على كرانه