اتروحون وتخلـونـي = اتروحون وتخلـونـي
ابمحنة اويتامـا اوذلّـة = اتروحون وتخلـونـي

عباس وعدك وينه = يابو الشرف والغيـرة؟
يرضى الأخو تتيسّـر = إخته ابولاية غيـره؟!
للشام ترضى أرحـل = والشام ماهـي ديـرة
اوعينك سهـم يعميهـا = والفرجة تعمي اعيوني

ياخويه لك عطشانـة = وانتَ ابدمّـك سابـح
جسمك يروحي غايب = واگبالي راسك لايـح
چيف امشي عنك وانت = جنب الشريعة طايـح
اوچيف أرتحل من دونك = اوچيفه تظل من دوني

ياخـوي مد لي چفّك = الگيـد چفّـي حـزّه
يابطل ذكره يجـري = بعروگي في كل حـزة
ياطود عـزّي بعـدك = دهـري تنكّـر عـزه
بعد المعـزة ترضـى = عدوانـك ايذلـونـي؟

عبّاس عنّـي عطفـك = ابهالحال غايب وينـه؟
لبـرور گفـرة لكـن = حنّت تصيـح اعلينـا
اوگلـب الجمـاد اتألّـم = والصخر بيّن لينه
واعداك في كل لحظة = ايشتموني ويضربوني

هيدوا مسير الناگة=خلّوها تمشي ابراحة
لا تزعجون احريمي=خلوها تمشي ابراحة

صاحت يظالم هيّد=في مشيتك واتأنّى
لا تزعجون ايتامي=مگدر ترى اعلى الحنّة
خل الظعن لا يعثر=طفلٍ اصغيّر منّه
في هالدرب يا ظالم= ما شفنا أبدن راحة

گال الها زجر الطاغي=كنتي ابأمس مخدورة
واليوم فوگ الناگة=رحتي بعد مأسورة
والله لحث الناگة=بدروبها المخطورة
أبدن ولا بتشوفي=فوگ الهزيلة راحة

صاحت يمن هو امفارگ=وطايل علينا افراگه
وروحي عليه ولهانة=ولشوفته مشتاگه
زجر وشمر يا خويه=ترضى يگودوا الناگة
ياعزوتي بخلافكم=ما شفنا أبدن راحة

شافت الحادي گاسي=ومازال بيهم يحدي
گالت يناگة خفي=من مشيتچ واتئدي
وكلما تهيْدْ الناگة=زجرٍ يگلها شدي
وسلكي الدروب الوعرة=وخلي المشي بالراحة

صبّت الناگة الدمعة=لازم بعد تتحمل
شافتها زينب گالت=ما ظل جلد لي ما ظل
يا ناگة يا منحولة=حالي امّنچ أنحل
من هالسفر والشدة=وينه أشوف الراحة

ماني متعودة أركب=فوگ العجيفة الضلعة
ما يستوي هالممشى=برٍّ طويل انگطعه
هالشدة لو عالجلمد=صبّت لكان اتصدعه
شدة وحادي وعجفة=ما بيهم ابدن راحة

يحسين عتبي اعليكم=أنت وأخوك الغالي
ترضون ليّه أمشي=حرمة بليّا والي
وانت يخويه ايميني=وعباس ليّه اشمالي
وانتون ظلي وكهفي=لا من بغيت الراحة