حاچيني يفنّاري الگلب وجلان
وكلما اضواك بحشا لبّته وج لان
ويلي اعلى الفنر مصيوب منّه الراس
چيفه اتفردوا ابهذا الجبل هالراس
ساطي منوصف بالمعركة هرّاس
وصار امزمل ابگازه الفنر عريان
شدخوه وانسكب گازه على التربة
وصارت جثته اعلى الگاع متّربة
وسف للفنر حبي مدلّل اتربّى
على العزّة ويطيح اليوم بالتربان
حاطت بيه كرانة ابزحف هدّار
وبگى ما بين شامت ويلي وهدّار
يا رب الفنر خلصنّه من هالدار
تراها دار بلوة وكلّها عدوان
حطيت العزا اعلى الفنر بالشيلة
يا هنّاس گوموا اوياي بنشيله
أنا عندي گبلْ ما فارگه شيْ له
محبوس ابفؤادي الواله الحيران
أگلِّك يالفنر يا ملتجى اعيالي
ليَّ النوح من عدهم ولعيا لي
وضعك منجدل بالحومة أعيا لي
يا حبي وگلبي ابگازتك دفيان
يا بعد الأهل خليتني بروحي
من بعدك ألم ساكن أنا بروحي
ميمرني السعد أبداً من بروحي
بس ايمر عليّ الطير بالأشجان
يفنير الضوى بن عمي يا بعلي
بابگبگ عليك ابصيحتي وبعلي
وباگول الفنر ضيعني وبع لي
وخلاني غريبة وما إلي وليان
يا بعد التتن والراس والدبّة
غلغل حبّك ابأعماقي ودبّ
شيل الراس فوگ الگاع لااتذبّه
حطّه ابحجري ذوّبت الگلب ذوْبان
حاچيني ترى اگليبي وهى وانطر
إلى كم يا حبيبي يالفنر أنطر
أنا الحرة المصونة ام التتن أنطر
لرفع البگبگة يالفنر بالدخان
فتح عينه الفنر گال الها يا حُرّة
بس اعتاب گبّتْ بالگلب حَرّة
أريد انهض وكل اوضاعچ أتحرى
لكن جسمي من كثر الضرب تعبان
يا گازات گلبي ودخنتي شوفي
سكبوا الگاز مني واخسفوا شوفي
شَوْفِي لچ يگطرة امن الگلب شَوْفي
ما أوفي إلچ يا زينة النسوان
لترفعين صوتچ آه يمنحولة
وشوفي احبيبچ الفنّار من حوله
مو من عين عدله ايشوف من حولة
وگبل كان السبع عفيات من حوله ؟
واحد بالحرب معروف ما له ثان
واحد بالحرب ما ليه أبد ثاني
أشوس ما إليه لاوي ولا ثاني
وامسى يگول بدْلْ الساني (الثاني)
صار اغلط بعد ما نتفوا ليه للسان
طاح وطاحت السمعة مع الهيبة
بعد ما المفترس شعلل به الهيبه
وصار ابجسمه يتسلّى ويلهي به
خبر صاير وگالوا كان يا ما كان
صاده اصداف رجلي چبوا ليه دهنة
فكره انحاس وتخربط إليه ذهنه
عساني من بعد عينه ابوسط دهنا
تغيبني ابثراها ولا غسل واكفان
وين ألفي اوين آروح من بعده
ما أگدر على افراگه ولا بُعده
دربي اطويل بعد الفنر وشبعده
وانه حرمة اوحيدة وماإلي أعوان
مالي غير فنّاري ضوى لعيون
هوْ وردي هو نبعي وهوْ لعيون
مدري صابته منّ الحسد لعيون
وعسى اعيون الحسد فيها اللهب شعلان
گال الها الفنر گلبي انكسر گومي
وحشمي لي يمريّة گومچ وگومي
وعلى الفك الدعاوي صبّي وگَومي
عليه الدنيا الله ايهد إليه لركان
هدَم ركني وباسي في الحرب هدّه
وجاني ابهدّة تتبعها أشد هدّة
ما فتّر وماليّنْ وما هدّا
وچبْ الگاز مني وفيّض الوديان
گالت يالفنر خليتني باخطار
وفجأة تروح عني بغير ما إخطار
يا مجدي العالي يالفنر أخ طار
يا حصني وسوري يا گوي البنيان
گامت والدمع فوگ الوجن همّى
وگالت والگلب الله درى ابهمّه
سهم النايبة عن كل أحدْ همّى
لكنّه وگع في گلبي الوجعان
شتّتوا شملنا يهل كرانة
وما واحد منكم والاّ كرانه
عجّل يالفنر كُرْ لو أكرْ آنه
ويگولون سبعة كرّتْ ابسبعان
لجلك يا ضوى العينين يا فنّار
وحگ الگاز هلوجْ في فؤادي ونار
لشعْلْ النار وآذبْ الجمع في النار
وكرانة أخليها اتشَعِلْ نيران
لَصك المفترس بيدي على عينه
واهف اعليه ونضّبْ منبعه وعينه
صدمنا ابفعلته وللحين ما اوعينا
وخلاّنا على الفنّار بالأحزان
رفع راسه الفنر گال الها يا حبّي
لو أگدر أگوم آجيچ لو أحبي
آح البيچ يا دخّانتي أح بي
وآه البيچ آه ابگلبي الولهان
يا روحي اگربي مني ولا اتبعدي
بعدي في الگلب عندي حچي بعدي
أوصيچ الگدو لچ زوج من بعدي
ولا أبغيچ يوم اتفكري في الگيطان
هذا امدلدلة منه دلاديله
يمشي والخمگ بالگاع مدّيله
أبداً لا تنُظري له وتمدي له
عينچ واحذري يا حبي لصبيّان
لصبيان أبداً لا تجي يمهم
ترى الشيطان خنّاسه ملا يمهم
هواهم گادهم للمفسدة ويمهم
وصلّى ابهم إمام الوسوسة الشيطان
أوصيچ بوصيّة وسمعي لوصاية
بشتي وصخمتي شيلي مع الصاية
واگريْ على روحي لو هو نصْ آية
ترى الميت في گبره ينفعه القرآن
والفك لين شفتينه لفى طوفي
وعينچ بالأرض يا سوري وطوفي
ولين اتعلّف ابّچْ حگري وطَوفي
ولا اتخلينه ايگلگل لچ الحنچان
، و غيره.. و كأن الآذان صمخى، و العيون عمياء.. و لكن .. 
