إجيت أكتب أبوذية إلى الفك
ضوى عيوني أنا ادري ابگوة الفك
صعب هزمه وكلهم يطلبوا الفك
من اشعارك يبو احنوچ الگوية

أبوذيات فكنا مطر حلت
وزادت بهجة الديوان وحلت
قوي ضرغام وإن مغرور حل لت
ايده وسلب منه العنجهية

افترس لعضاء وباب الجوع بطل
اوچم واحد لبوذياته بطل
وسكب فوگ الأبوذيات بالطل
وصارت صفحة الموقع ندية

إلى اللي مالحگ عالفك اوفاته
وفي موصوف ويامحلا وفاته
وكل من جابهه أعلن وفاته
وبگى الديوان في حزن وعزية

رفعت الضو علــــــى عيني وراسي
وحبه فـــــــــي الگلب ثابت وراسي
وقارب حبي فـــــــــي ساحله راسي
خلف چبدي أبــــــــــو النار الضويّة

رفعت الضو علــــــى راسي وعيني
وفاضـــــــــــــــت بالأبوذيات عيني
يـــــــــا نفسي على المعروف عيني
أرد معروف للضــــــــــــــو بالبُذيّة

فتحت الگلب يـــــــالضو ليك منزل
وفرشت ابگلبي حبْ ما هوّه من زل
فرشته بالوفا اللـــــــــــي عنّه منزل
ولا ننحرف عــــــــــــن خطّه سويّة

كفو يا ضو ضوت من غير لاهب
شعرك كالنسيم الــــــــــزين لاهب
لگوم اويـــــــــاك ياضوِّي ولاهب
علــــــــــــــــى الديوان هباتٍ گويّة

ترى احنه اخوان وبلال اخو عنبر
ودا اولنا مسك الثاني عنبر
عن بحرٍ تجونه وجو او عن بر
ابأحلى امن الجلي ولمحلبية
حس الصخة

فلبوذيات آنه توي واعد
گعدت أحسب بوذيات فكنا واعد
اشكثرها صعبة لكني اواعد
نسوي ديوان أبوذيات فله

اذا بان الفنر ما بان غيره
أو يدري الفنر تاكلهم الغيرة
يضو الهدرة هذا الحچي غيره
ترى الأشعار محتاجة رجاجيلْ

أسف صارت لبوذيات تنعابْ
أو بوم الضو نزل بالهرج تنعابْ
أظنه من أخس عين او نتنْ عابْ
واظن يبغي إله موعد تحاليلْ

مهو بالإسم يا ضو تحصل امرادْ
أو لو تمردها نجمات السماْ امرادْ
تظل في الأرض يا ضو في الحجم رادْ
صغير انت مثل حجم الفغاليلْ

أريدك من يبان الفنر تنطمْ
مثل شان الأذون ابعالي تنطمْ
بحر هذا الشعر ويّه المتن طمْ
تريد اجيال تبحر فيه لا جيلْ

أباصول وحــــــــــــــــرايبكم حطبها
أنا نار الوغـــــــــــى وانتوا حطبها
لنثّركم اخشابٍ مــــــــــــــــا حطبها
ولا حطّاب مــــــر بيها ابدجى الليل

أنــــــــــــــــــا فارس لبوذية وفكها
لخلّصها مـــــــــــــــن همومٍ وفكها
مـــــــــــــن الفنّار واخوانه وافكها
ويا مــــــــا اتأفكوا اعلينا ابأقاويل

شعري ابلاهبه اللاظـــــــي وراهم
حچي راكب علــــى المعنى وراهم
وانــــــــــا بأول المركز مو وراهم
ومــــن خلفي الفنر ويصيح بالويل

على بـــــــو الگاز لاتمطى ولاهب
واصب الشعر مـــــن فوگه ملاهب
وطفّي نــــــــوره الخابي ابما لاهب
وامُطْره بالشـــــــــعر مطْر الأبابيل

كفو يا ضو ضوت من غير يمرة
شعرك كالرهش في الحلگ يمرى
ملك أنـــــــــت الشعر عبده ويمره
وعليه السمــع والطاعة والتبجيل

كفو ونعمين يـــــــــالضو هلكتايب
حروفك جيش جــــــــــرّار ابكتايب
فر الفنر مـــــــــــــن شعرك كتايب
فر مــــن ذنبه والمدمع جرى سيل

ترى منْك الفنر يـــــــــــا ضو غاير
وشعوره بالحسد فــــــي گلبه غاير
دوم ايخالـــــــــــــف السالك ويغاير
حتى يبان مـــــــــــــا بين الرجاجيل

أظن داخ الفنر وانذهل مـــــــــــني
أجي له من اهناك ايجيني مــــــني
ونفسي بافتراسه مــــــــــــــا أمنّي
چيف آنـــــــه افترس گازات وفْتيل

سألوا عني كــــــــــــل قرية ومدينة
واحروف الشعر ليّـــــــــــــه مدينة
أكر بيها الفنر واللــــــــــــــي مدينه
وخلّي انهاره مــــــا يعرف من الليل

أبو الگاز افسما الديوان لابد
لابد غيمته تنگشع لابد
او يصفى الجو إلي بروحي للآبد
أسد في غاب أو لارانب بگية

رئيس الغاب لين أكتب گصيده
أصيد الشاة واللگلگ اصيده
ودا ثعلب مكر بي آگص ايده
وگص ذيله بنيابي المبردية

لبو الفتلات أباوجّه رساله
وحذره إنّه طودٍ شم رسى له
لشافه الگاز منه دغري ساله
فتايل تنشف او متظل طرية

أبو الگاز الفنر لحدود خطّى
وعلى جيده الموت الصخّه خطّه
وبسوّي له حگ اطب ابّير خطّه
اوگوع البير يوسف بيد اخيّه

ترى شعر الفنر لصماخي فتّه
او بطّل باب للگرگه او فِتّه
ودا ايريد اللّخو آفتّه فتّه
وبعطر جثته ، يطلع إليّه
حس الصخة

عجايب هالزمن ما تطلب اردودْ
فرص ترحل أو ماليها ترى اردودْ
غريبة من تشوف اعلى التمر دودْ
يهددني اللي فر عن ساحتي اسبوعْ

أسف صار اللي ينطح جبلنا غرْ
ولا شوف الجمع بالغضب ناغرْ
أنا اللي الشعر بلبولي وانا غرْ
أروّيه او إلي يعطي الأمر طوعْ

أنا اللي ما أحد يوگف إذا بنتْ
أنا الرجّال واللي گبل فر بنتْ
يگول الفك أنا عن هجمته اجبنتْ
يخرّف والشمس ميعوزها اطلوعْ

أو حس الصخّة من كثر الهرج باحْ
أو كل شي عنده في گلبه ابخجل باحْ
((من ايظنّ الگمر يهتم بلنباحْ))
يظل عالي اعلى كل واهم او دلّوعْ

أباكلكم مثل فيليه وچلاب
او مابطلع من ارضي وببگى چلاب
او ويش اعلى السما من نبح لچلاب
أو في وين الثرى او وين الثريّه

لو كل من نجر ما ظلّت اشجار
وبسّك سفسفه يا فنر واشجار
شللي بك حصل واستوى وشجار
وسويّ العگلْ مْحنّك بالرويّه

مهو صح يالفنر إنت اقوى منّي
ودا منّك القوة التقوى منّي
تحفّل صخّتي واتّق ومنّي
تحذر لگلبه گازك لميّه

أنا بعرك الوطيس اطعن ولا هود
وگومك مرهب اوگوم النبي هود
أنا اگوى امن البطل لشجع روبن هود
أنا فارس من ابطال الغاضريه
حس الصخة

اشعاركم مضويه لمكان كله يحباب
اجيتكم تايه بين احروفكم يحباب
ضليت الطريگ ويومٍ شفته گلت يح.. باب
ودشيت منه وانا كل امنياتي تستگبلوني

اشعاري حلوه اتمنى تعجبكم
بكتب احروفي يومياًاوبخليها تِعِجّ إبكم
واتمنى اكون الضيف الخفيف واعجبكم
حروف في الصميم أنا اخوكم يالله اقبلوني

تحياتي حروف في الصميم

أباصارُع فنرنا وله أبَلكُم
وباغركم بشعري وأبِلكُم
وهالفك في الأبوذيات أب الكُم
تِحذر يالفنر ضوي لظية

إذا ماتعرفِ النِد عنه سايل
أنا الضو يالفنر وعندي وسايل
لخلي دمع العين يتصبب وسايل
على خدك يبو عيونِ الگوية

بُذياتِ الفنر ممزوجة بالخل
لتلعب اترك الضو عنك وخل
وهذي نصيحة من أخو لخل
تِعدل لاتِظِن السوء فيّ

الضو إلى الديوان بُذياته وهَبْها
وبنفخه وحدة يطير قصايدكم وِهِبها
وِلشعارِ الفنر الضو وهى بها
تِحمل لدغي چنه سموم حية

شعري للفنر علاّه وبچّاه
أنا واحد كبير وهوّ بچّاه
كيسا تم فنر لتگول أچّاه
وانتَ امبين فكيني فريسة

عجيبة اصغار وعليَّ يردّون
ميخافون من أشعاري يردون
واذا كانوا حياةْ وعمرْ يردون
لايخوضون هالبحرْ اووطيسه

نويت اعلى الفنر مني بنيّة
وانا يعرفني رجال وهوْ بنيّة
ابناضجْ شعري بفترسه وبنيّه
وباطمّه بحروفي وسطْ خيسة

فنر بچّاه بعدك وانا بدّاه
بديت انته الحچي مانه اللي بدّاه
تحمّل فكي حين الناب أبداه
لا تلولي إذا تعاين اضروسه

بعد ما أفترس وافرش محلّي
أفكر يلفنر هل بيك أحلّي
ألاگي جسمك املعوز ومحلي
وعبير الگاز سوى المحل خيسة

يأعوجْ بصلحَك بيدي ورمّك
بس خلّك ابديواني ورمّك
والا روح واتمشى ورا امّك
وعيش الدنيا وياها ونيسة

رديت اعلى ردّك والسنْ ابْسن
وسيف الرد أباحد ليه وابسن
وخلّي ابهلمشاعر هنرك ابسن
يسوي من ملاحمها النفيسة

عن الديوان والله مانه جايز
ودرُب غير الثقافة مانه جايز
يمكن في هلدنيا كل شي جايز
سوى أن الفنر يبتهج فيسه

يريد آمنتُ أشعارٍ لهيبه
لأنّه ماحصل شيٍّ يلهي به
بس الفك ليكتب شعرٍ له هيبه
أو أمّا الباگي طلاب ابصفوفه

يضو اقروش لا تتعلـّـف ابهم
أمهم نارجيلة وفنر أبهم
وإيد الفك تشيل اثلاث أبهم
ومن انيابه يشيل اسبير ميّـة

يضو رحلك گبل ليجون شِـدّه
وتثور العركة والديوان شِدّه
لو بان الفنر بس ،،فيك شدّه؟؟
نصيحة ادرس الفكرة بكل روية

في بحر الشعر هذا يختنه
قوافيه وابجدياته نختنه
أولو واحِد يردنا ابشر نختنه
ويجر بحزان أذيال الهزيمه

أنا باگوِّي أشعاري وبضمها
مثل والد لبنته ابحب اضمها
ولا اتنال الشفاعه الاّ ابرضى امها
ورضى الوالد مع العترة الأبية

يصمت اشلون تطلب مطلبك هاي
تريد اعليهم آسلِّم وگِل هاي
أبد ماأرضى بالذِّلَّة الاّ بنهاي
ويآنه يا اُهُم يُذبح ضحيَّة

العقل في راسك وتعرف خلاصك
لروحك لا تجر نارك خلاصك
أظن بيت الهجو منهم خلا صك
ومن الأطرم صعب تفهم حچـيّه

سجيـّـتـنـا السلم يـُـظهر ولانه
وحديد ، الماي ما ذابه و لانه
عسى ما تفگد أحبابك ولانه
مودة الآدمي للآدمية

يصوت الصمت چنَّك رايد اخلاص
أو تدري نجتمع عالوِد والاخلاص
نخيل الهجو تجني اخنيزي واخلاص
وأنا مبغاي أقوى في البوذية

أنا ضو الأبوذيات شع بي
حبري الحاكم وأفكاري شعبي
عليك اسم الله ، ( خنچوفك ) يشعبي
لـَـتجعل غيبتك ضخمة عليّ