هلا أخواتي / أخواني

مثل ما وعدتكم أن أشارككم بطريقة

المنفور

شهريـــار

أشتم ريحة المنفور=وعاوي رنگة السنور
يدوّر في السكك لعظام=وضل في كل خرابه يعور
طريقتها بسيطة هواي=إذا تبغي طعمها الزين
جيب اثلاثة گلاصات=كبيرة امفوّلة بلطحين
ومهو واحد ولا اثلاثة=رقم لطحين ( رقم اثنين )
وخذ سكّر فرد كاسه=وخل الماي بس كاسين
وامن الزعفران اشوي=يحلّي ريحة المصنوع
حطـّـه ابطاسه او خلّه=في ماي الورد منگوع
وخذ لك ملعقة اصغيرة=هيل امدگگ او مطحون
وآخر وصفه للطبخه=نصف الكاس زيت ايكون
خل لطحين فوگ النار=اشفشف يعني ايحمّص
ولونه يصير بنّي شوي=او نخله لين بتخلّص
وحط الماي والسكّر=ويه الهيل فوگ النار
ويه الزعفران او شوف=هالمخلوط يغلي صار
وعلى لطحين لمحمّص=ضيف الماي وحركه زين
ورجعه النار لي مدّة=دگايگ عشر مو عشرين
وذا جت حزّة التقديم=قدمه بصحبة الگهوة
إلى لضيوف وابتعرف=صدگ الطبخة هَي تسوه
يامن يستمع شعري=كتبته من صليل اشعور
أشكر ليكم اصغاكم=وتعب لتمعّن ابلسطور
في أكلة ورثناها=جد عن جدّه عن لجذور
وادعوا لي برضا الله=ورضاه الوالد المبرور
واشكر في أخير القول=همة شهريار النور
واتمنى على سفرة=ويّاكم آكل المنفور