أقدم لكم القصة التراثية الرابعة من سلسة التراث الكرّاني.. بعنوان بــدر البـدور..
بس هذي القصة قصيرة.. -منقرضة-
بــدر البـدور
على لسان أمي:
حتى تصلون على النبي، وما تنسون إمامكم أبو الفضايل علي.
الجماعة اللي وياها: ما ننساه ولا ينسانا إن شاء الله.
سلطـان سلطان الله، وبليس خزاه الله و.... لعنه الله..
عنكم وعن كان فيه أخوين معرسين.. كل واحد عنده سبعة أولاد الأولي عنده سبعة صبيان والفاني عنده سبع بنات.. "شباب يعني"
عاد الحين، في يوم من أيامات الله ما شاف الاخو الفاني الا الاولي جاي له يگول له چان تعطيني بتّك بدر البدور لولدي.. گاله باشوف هي ويش تگول اذا موافكة مي مشكلة هدي الساعة المباركة..
راح الابو لبتّه وسايلها تبي تعرسين على ولد عمّش؟ گالت له ما علي لكن عندي أول شيء شرط.. اذا وافكوا عليه باخذه.. گال ليها ويش شرطش يا بتي؟
گالت له شرطي ان اني وهو واخواني واولاد عمّي كلهم نسافر ويّه بعض.. سايلها وينه تبين تروحون؟ گالت له لندن..
راح لأخوه وگال له الشرط ووافكو عليه بس هم ما يدرون إلاوي تبي تسافر هالمكان.. عاد بدر البدور بنية دكية وشاطرة و تسوي اشغالها بسرعة.. گامت هي الا حجزت الطيارة للجماعة وجهزت اغرض خواتها.. وحددت يوم السفرة.. وكل شيء سوّته على أحسن ما يكون..
ويوم السفر تجمّعوا كلهم في الطيارة وتيسّروا لندن.. عاد يوم وصلو، يبى ليهم واحد يحجز الفندك وواحد يشتري ليهم اكل وواحد يدليهم الطريگ.. جت ليهم بدر البدور وسايلتهم ها منهو الا بيحجز لينا فندك؟ گالو ليها ما عندنا بيزات! وما نعرف نتحچى گلينزي ..گالت يوو چيفة ما عندكم بيزات؟؟ ويش بنسوي هني بليّة بيزات؟؟ وچيفة ما تعرفون تتچلمون گلينزي؟ويش خانتنا؟ گالو ليها ما ندري.. گالت ليهم چيفة بتاكلون؟ گالو ما ندري.. گالت تدرون.. يا أمّه نرجع بلدنا أو تخلوني أچويكم كل واحد چوية وبعدين بحجز ليكم الفندك وكل شيء باسويه ليكم.. واني اعرف اتحچى گلينزي عدل.. ها ويش رايكم؟؟
گالو ليها ما علي چوينه كل واحد چوية.. واصرفي علينه.. وسوي لينه كل شيء.. وصدگ چوتهم كل واحد چوية وصرفت عليهم وأكّلتهم وشرّبتهم.. ويوم انگضت المدّة رجعو بلدهم..
سايلو الأبو وأخوه بدر البدور ها ويش موافكة تعرسين عليه؟ گالت لا..گالو ليها يوو إلاوي؟ گالت: ما عنده بيزات يصرفهم على روحة چيفة بعيّشني ويّاه؟
مضت أيام في أيام .. أيام في أيام.. كانت بـدر البدور تتمشى في الدالية.. رايحة العانة بتغسل مواعين الغده.. وشافت واجد صبيـان گاعدين عند عتبة بيت بعيد منّاك.. التفتت ليهم.. شافت واحد فيه چويـة.. عرفته ولد عمها.. عاد هو گام يطالعها.. يگول هدي منهي؟؟ ايي هدي بت عمّي بدر البدور.. التفت ليها حاملة گدور الغده..
الا هي تگول له: عليك يا بدر البدور صِرِتْ حوّاج تدور..!
جاوبها.. يعني عطاها جواب وگال ليها:ليش يا بيضة مليحة صِرْتِ حمّالة گدور؟؟"يعني هي بدر البدور كانت حليوة وبيضة" أي وتفاهموا ويه بعض.. وعگب ما تفاهموا تزوجو ..
انتظروا القصّة القادمة بإذن الله
