لوى اعنان المهر بو سكنة وتوجّه للحرم
نادى ياأخلص خليصة اتكشّفي حال الخيم
ما تشوفي بالعدى بحر الغضب يلطم لطم؟!
منهي ياصبر الصبر من دعوة رجّت كربلا؟
جاوبيني ياعقيلة گبل ما أنشد اخدور
ماهي مهجة فاطمة من نفخت ابكربلا الصور؟
گالت اگليبي مثل گبلك على الشدّة صبور
ياخلاصة طه مو توّي أمر ابمعضلة
عاين اخيامه اولمح چفّين أرجفها الخشوع
لنها فضّة اتصوّب اعلى العرش أسهم من دموع
اوتقسم ابحرمة عظيمة اتكسّرت منها الضلوع
والسما اتسجّر غضبها والأرض في زلزلة
منع فضة رحمة الرحمن والگلب السليم
من صبر أغواره أطفى النار في لب الهشيم
والصبر بالمعضلة مايملكه غير العظيم
اوذكّر المرأة التقيّة بالصلابة في البلا
گالت ابزفرة مريرة غربتك يابوعلي
ذوهلتني اوحال نسوانك تصيح ابلا ولي
ماگدرت احتمل جرحك مع جرحي لوّلي
من جنين ام الحسن واللي أصابه حرملة