جاء رمضان بكل ما يحمل من إثارة
سنحاول من خلاله أن نتحاور مع الأعضاء
ونستخرج ما تبقى من ذاكرتهم مع هذا الشهر الكريم
نتمنى أن تكون هذه الحوارات تحمل روح الإثارة و السخرية
ويسودها الاحترام و المودة
. . .
البطاقة السكانية لو سمحتي ؟
الاسم: حيدريه
العنوان: ديوان الثقافة
المهنة: طالبة
أممممم أول ما يجي شهر رمضان ويش يمر في خاطرش ؟
اولا اتحمد الله بانه قد اعادني على هذا الشهر ولم افقد عزيزا ولا صاحبا ولا انسى طبعا الجو الروحاني الذي يملئنا به شهر رمضان ووالجو العائلي الرائع و السهر واحياء ليلة القدر والطبخات على كيف كيفك طب وتخير (صدق لين قالو شهر رمضان شهر الخيرات)
خبرينه على برنامجش برمضان ؟
السنوات الماضية كان يومي المعتاد بدون نوم يعني ما اصحى من نوم ولا شي بل يبدأ النوم في المدرسة لحوالي 3 حصص الاولى والفرصة كل نشاط والحيوية والسادسة في سبات ارجع البيت تروح النومة قهر اصلي واسوي السلطة واني اطلع التلفزيون ياذن اصلي المغرب اتفطر مع العائلة واغسل المواعين واتجهز يمرون الربع نروح الماتم نبدأ البرنامج بقراءة القرآن وبقية البرنامج للساعة 11 وارجع ونسهر للصبح يا نحي الليلة بالسوالف او بالاعمال اتسحر واصلي ويتفرق الجمع يا انام او اكمل سهر
أما حاليا البرنامج اختلف: الوحيد الي اختلف اني ماكو مدرسة بعد تفرق الجمع انام واقعد 11 اصلي واغسل مواعين السحور ادور بالمطبخ كان في شغلة مو جاهزة اسويها مثل اقطف خبز للفريد اصب الجلي واحطه بالثلاجة يعني فيه طبخة تسويها اختي اطلعها اساعدها وبعدين اقعد اسوي اعمال اليوم واقرأ قرآن اتابع مسلسل واحد فقط بالعصر يأذن اصلي ونفس البرنامج الماضي ولكن بعد ما ارجع من الماتم اقعد قليل على النت أقرأ قصص وبعدها اقوم
أنتي من متى ابتديتي أتصومين ، وخبرينه عن قصصش
يوم أنت صغيرة وتفطرين بالسر ها ها . . گولي لا تستحين ؟
بدأت أصوم واني بصف الثاني اذكر لأنه السنة إلي قبلها كنت بدأت البس الحجاب وكنت الوحيدة بالصف لابسة حجاب وأما عن القصص واجد
بس إلي ما بنساه موقف واني صغيرة كنت اتفق مع بنت عمي يفصل بيتهم وبيتنا جدار وكنت اتفق معها انه تجيب أي شي من طبخات الي بيتهم يسونها واني بعد واسوي رنة لتلفون بيتهم ابو روبية ما يكشف الرقم وهي تعرف على الوقت المتفق تفهمها ونركب فوق بالصدح وناكل وبسرعة بسرعة كان حرامية واكثر شي كان بيتنا وبيتهم ما يتسغنون عنه حلاوة الشعيرية تجي و جفها متروس واني بعد ونتقاسمه وناكله هههه بس محد كشفنا
أكله على الفطور ما تستحملين اتشوفينه ؟
والعكس : أكله على الفطور ما تستحملين تگعدين
بدونه ؟
اكله ما استحمل اشوفها هي عصيدة النشا وأكله ما استحمل ما اشوفها الفريد
موقف فكاهي حصل لك في رمضان ؟
بل مواقف واجد بس استحي اقولها بقول موقف حلو اذكره كنت بيوم من شهر رمضان واجد تعبانه وماكو شي بالمعدة والتفكير والحواس طاير والخمول والكسل مجمد مخي كنت اطلع التلفزيون وقمت تمللت ورحت ادور من المطبخ للثلاجة اشوف شنو فيهاوبعدين للغرفة رايحة جاية متنرفزة محد يكلمني كنت بالمطبخ ما سمعت اختي تصارخ وينه ريموت التلفزيون وادوره عافسة الغرفة و جت للمطبخ ادور واني ساكته ما ابي اتكلم وهي تصارخ وينه انتين أخر وحدة واني موصلة حدي وساكته عنها لاني ما اذكر حملته او أخذته بايدي وياي واداور بكل مكان وتقول وين وديتيه رديت عليها ويش دراني اكيد بالغرفة يعني وينه وهي كانت معصبة ادور فتحت الثلاجة بس جدي اني ما توقعتها ادور بالثلاجة فتحت الخزان الفوقي شافت الريموت مثلج وبارد قامت تصرخ عليّ تقول اكيد انتين واني انقلبت من معصبة وقمت اضحك وامي بعد وكانت السوالف على الفطور هي سالفتي وضحكوا عليّ وخصوصا اخواني سوني مطنزة
لو طلبنه منش تعزمين شخص واحد من أعضاء الديوان على الفطور من بتختاري؟
بصراحة كلهم عزيزين لان ان قلت وحدة الكل بيزعل حياهم الله كلهم
لو عزمتش وحدة من صاحباتش على فطور ..
ورحتين ويه الوالد نزلش عند باب البيت ومشى ..
وظليتين ادقين الباب ومحد يرد عليش ..
وش راح تسوين ؟؟
أولا الوالد ما يسوق يعني مثلا لو اخوي كنت بكسر الباب وبعدين بتصل فيها وبعطيها الكلام السنع وبسكره بوجهها علشان ما تعيدها وتحترم المواعيد وهذا دليل عدم احترامها لي لكن مو جدي اني بتورط لو اتصل في اخوي بزفني من العدل وبيكون اخر توصيله وبيطنز علي ما تسوى علي لكن شنو بسوي يعني كنت بتصل بامي بفهمها سالفة غير بحيث تقتنع فيهاو تتصل في اختي او اخوي تقول اليه يرد الي
ويش رايك في :
زهرة الربيع
خوش عضوة
زهور
بصراحة ما اعرفها
شذى الروح
عضوة نشيطة ومواضيعها حرة
أنتِ تساعدين أمش في المطبخ ؟
أكيد أساعدها أمي الحنون هذي
وويش تعرفين تطبخين ؟؟
اعرف اطبخ حلويات وورق عنب بصراحة اني ما جربت اطبخ يعني صالونه مجبوس بس اساعد امي و اطلع شنو تسوي بس ما مرة اني سويت بس حلويات كل شي شعيرية ,آي سكريم بسكوت, كنافة,قيمات, يعني هالسوالف
يگولون أن البنات هم أكثر المتتبعين لبرامج
ومسلسلات التلفزيون في رمضان ، وما عدهم طقوس مثل
لرجال مثل القراءة في الكاتم واقامة مجالس الذكر الخ من الأعمال
ويش تردين على هذا الكلام ؟
فعلا و القنوات ما قصرت لكن الرجال متساون مع النساء في اقامة الطقوس مثل القراءة القرآن في الماتم وللاسف الاثنين يعانون بقلة الحظور ولأسف النساء تقيم القراءة بماتم موحد وتشوف حضور قليل بالسنوات الماضية اما الان نلاحظ تطور اما الرجال لازالو يعانون ويقيمون ولا عشرين بيت او ماتم كلهم يقرؤون القرآن ما يشوفون اله كم واحد وكلهم رجال كبار في السن قليل اذا شافو شاب يعني في منغصات وللاسف ( والجامعة والمدرسة هو العذر يعني شنو وراح يردون وهم مقابلين هالصنم من مسلسل إلى برنامج)
كلمة أخيرة ؟
أشكركم تقنيات/ قناديل على هذه الأفكار الرائعة والجهود المبذولة ونتمنى ان يرقى الديوان بكم
شكراً على قبول الاستضافة
ولو حاضرين كل يوم تعالو
الفريزر 
وعسى الله يعوده علينا وعليكم 