بالأسود وتصويره=لازم نفخر ونعتز
مصوّرخلا حتى ابليس=من إبداعه يتنرفز
لإيده الكاميرا انصنعت=من هالسبب ما تهتز
يعجز يدركه الإبداع=وعن لبداع ما يعجز
ماهو مثل بعض الناس=بالكاميرا يتعنتز
يصوّر لقطة مقبولة=وباگي الميموري املعوز
ولو بافصّل الأخبار=بتعب.. اسمع الموجز:
مو كل من لگط صورة=مثل الأسود اميّز
ولا كل من شفط شفطة=ولد حسين اذا مزمز

يا ويلي على التصوير=روعة تسحر الوانه
خصوصا كامِرة لسود=cannon كشخة وفنانة
خبير الآلة في إيده=ما هي آلة ، إنسانة
ما يتقارن ابداعه=ابأترابه وأقرانه
مصوّر لو اتحط له اخيار=ابفنه ايطلعه رمانة
والجحشة يطلّعها=ابضغطة واحدة احصانة
لكن غيره ليه صوّر=بعوضة اتصير ذبانة
ولو صوّر إليه روضة=خضرة اتصير ذبلانة
واتشوف اصوَره واتگول=الله يخزي شيطانه
الفوكس دايم امگرّب=وما مضبوط ميزانه
والغالق بلا سرعة=بفلاش اضواءه خفتانة
وتطلع صورته تالي=چنها اتگول نعسانة
يفكّر أنه هالميدان=گليل العگل ميدانه
خلّى ايجي عديم الذوگ=ايطالع صور ديوانه
ايشوف الأسود الساحر=إلى التصوير عنوانه
ايركّب صورته بحساس=وكأنها تحچي بلسانه
والصورة التريد اشجان=يبث فيها من اشجانه
والتحتاج بعض احزان=يطلّعها لك حزنانة
واللي اتصوّر الحيرة=ابحيرة اتكون مليانة
واذا في صورته بسمة=تخلي الدنيا جذلانة
مصوّر ما هو بالعادي=الأسود زين كرانة

مصور يعجز الإبداع=يدرك مستوى فنّه
لو يدرس مائة صيفي=مايوصل ربع مِنّه
يوم اليترك التصوير=تلگاه سائِلٍٍ عنّه
يرسل ليه مسج أشواگ=يضرب ليه ألِف رنّه
مايرضى سوى الأسود=يتعناه او يتبنَّى
مسيطر في العمق تحطيم=كل هذا وأشد وزنه
ربِّي يحفظك لاهلك=ويحقق كل ما تتمنّى