نــزلة الكوفـه يـاعلي قشره علينه
نطـلب من الله تـطيب وتردنـا المدينه


قشره علينه نزلة الكوفه يبو حسين
قلهـا الحسن يخـتي السّـلامه للأبو منين
فالـك عسى فال السّلامـه ياضيا العـين
مـا تنظرين السّيف شـق غـرّة جـبـينه
ماظـنّتي مـن طـبرته حامي الحمـى يقوم
هذا الطّبيب يقول سيف الرّجس مسموم
مقـزِّر أبـونا حسبتـه يومٍ بعد يـوم
لونــه تغـيّر وانتحـل مـا تنظـريـنـه
قـالت يَعقلي نطلب امن الله السّلامـه
و يقوم ابو الحسنين و يـتمّم اصيامـه
ونـعـيـّد ابزينــه و لا انعـيّـد يـتــامى
قلها يَثكلى الـعـيد لا تـتذكّرينه
يخـتي يَزيـنب جان عيد اتعيّد الشّام
جان الخبر وصّل يصير أبرك الأيام
و احنا بـعـد ليلـه و يوم ونصبـح ايتـام
عند الفجر كهف الأرامل تفقدينـه
صاحت عسـى بعيـد البلا يا قرة العين
بـالموت لا تفاول على عز المسلمين
اسم الله على كهف الأرامل والمساكين
لا قاله الله يا حسن نـفقـد ولـينـه
فـتـح عيونـه المـرتضى والـدّمـع يجـري
وقلها يزينب بالنّجف محفور قـبري
قـالت يبو الحسنين بعدك جيف صبري
يــا بـوي جيف ارجـع بليّـاك المدينـه

شكراً يا تقنيات على هذه المشاركة القيمة
والتوفيق أن شاء الله في الشعر

تحياتي || الصادق