شفت ابعالم الرؤيا =ظعن يم كربلا نازل
في يوم اربعين حسين=ودمعي اعلى الوجن نازل

رحت الكربلا چني=إلى المظلوم بازوره
ودخلت ابروضة قدسية=مثلها ما شفت صورة
والا بالظعن شفته=هوادج كلها مستورة
تعب وهموم لاگيته=وتوّه من سفر واصل

واصل توّه من سفرة=لگى فيها أذى وشدة
امبيّن وشكثر تعبان=وگاضي امن الألم مدّة
هلّت دمعة اعيوني=وگربْت آشوف وشعنده
والا بالشهيد حسين=يم ذاك الظعن ماثل

فجعني واگف المظلوم=بس جثّة بليّا راس
شفته وچنها مو حلمة=چنها صدگ يا هالناس
وحتى بالعلامة كان= صدره أفتكر منداس
گام الظعنه مستگبل=لأنه الوالي والكافل

شفت حسين گام الهم=يستگبل حرم واطفال
ينزّل هذي بالراحة=وذيچ ايسوّي ليها اظلال
وكل آلام في ظعنه=يحوّلها إلى آمال
نزّلهم سوى هودج=وكانت وحدة فيه داخل

هودج واحد الخلاّه=وما جا له أبو اليمّة
واشوفه اتباعد اشويّة=ودليلي استشعر ابهمه
رحِت يمّه لأنْ گلبي=دارت في حشاه چلمة
أريد استفسر وأعرف=عن الشي هالذي حاصل

بگت ليه وحده في الهودج=ما نزلت بعد للحين
گِلِت له سيدي ومولاي=هي زينب إجت يحسين
گال حسين ما أگدر=على شوفتها ما لي عين
أزيد احزانها وأدري=گلبها وشكثر شاعل

أحزان اللي بحشاها=ما أبغاها تتسعر
أنا أدري إذا شافت=أخوها حسين ما تگدر
ويش اتشوف يا شيعي=جسد متبضع ومنحر
راسه منفصل عنه=معلگينه على ذابل

ما أگدر على زينب=تصد وانه بليّا راس
وشافت راسي في مجلس=يزيد امكسّر الأضراس
أجرح گلبي حگ اختي=ولا ينجرح ليها احساس
صعب يا شيعي أنظرها=تطالع والدمع سايل

وين اگدر احط عيني=ابعين ام الخدر زينب
واتذكّر معزتها=وذاك الصون لمرتّب
أخاف اتگول لي يحسين=خدري ابكربلا اتسلّب
وانته اللي جبتني اوياك=في ذمة أبو فاضل

يا شيعي إذا صديت=يم زينب ترى بوگع
كفاية اعليها ذوّبها=مصابي ساعة المصرع
ما أبغاها تبچيني=ترى ما تم لها مدمع
وعسى كل محنة عد زينب=توگع على هالكاهل