في الليلة الأخيرة ..
بعد الألف ..
استيقظت .. على رائحة جلل
اسكرت عيني .. ببهجتها ..
رد ولا أروع .. من ريشة .. كنت
أحسبها فنانة في البهارات والقدور وحسب ..
وكم كنت مخطئا ..
ضيفتنا .. هذه الليلة .. تجاوز فنّها
جدران المطابخ .. ليسكن القلب
بجماليته ..
ويغوي الصدر برائحته ..
نتشرف قناديل + تقنيات
أن تكون شهرزاد .. ملكة المطبخ .. ضيفتنا
1) البطاقة السكانية لو سمحت ؟
الاسم : شهرزاد
الكنية : أم القصص
العنوان : حكاية شهرزاد
تاريخ الإصدار : ولادة سيف شهريار
تاريخ الانتهاء: حتى الأحفاد
الجنسية:ألف ليلة وليلة
المهنة : زوجة وأم وقصصية
2)
أممممم أول ما يجي شهر رمضان ويش يمر في خاطرش ؟
أشياء وأشياء وأهم شي لما نجتمع على السفرة مع الأهل
وأذكر وقت توزيع طبخات رمضان مثل الهريس والقيمات وغيرة على الجيران والأهل طبعا أني على طول يكون من نصيبي التوزيع على بيوت الأهل البعيدة وكنت أكره هذا الشي عشان تعب لصيام وخاصة إذا كانت السفرة جاهزة والأذان گرب وأني للحين ماكملت التوزيع
بس صراحة لحضات عجيبة الواحد لما يكبر يحس بهذا الشي.
3)
خبرينه على برنامجش برمضان ؟
ماعندي برنامج معين كل يوم يختلف عن إلي گبله بس في شي يومي أطبخ وأصور الطبخة وأحطها لكم في ديوان الطبخ وبالعافية على گلوبكم
وطبعا دائما العزايم موجودة وأحسن شي فيها الجمعه مع الأهل والأصدقاء.
4)
أنت من متى ابتديت أتصومين ، وخبرينه عن قصصك
يوم أنت صغيرة وتفطرين بالسر ها ها . . گولي لا تستحين ؟
بل يمكن نسيت شوي بس من زمان من يوم كنت صغيرة
بس الوالدة من حبها لنا بس أرجع من المدرسة تكون مجهزة لي أكل شوي وطبعا بعد ما أخلص يكشفني أخوي إلي أصغر مني
لأني بس قررت أصوم هو بعد قرر فالوالدة تعطية ياكل بس يرجع من المدرسة فايقول أكيد أن أنتي بعد أكلتين ويفضحني.
5)
موقف فكاهي حصل لش في رمضان ؟
في أول سنة أصوم فيها بعد ماتسحرنا وكان قبل الأذان بشوي نسيت ماشربت ماي وكنت عطشانة وقلت بس خلاص يمكن أذن إلا يقول أخوي لا للحين طبعا ركيض على الماي وبعد ماشربت گام يضحك
ويگول أدن من زمان وفضحني وعلم الكل كأني متعمدة.
6)
لو طلبنه منش تعزمين شخص واحد من أعضاء الديوان على الفطور منهو بتختارين ؟
أعزم كل بنات المنتدى حياهم في أي وقت
7)
خبرينه عن المسلسلات اللي اتابعينها في شهر رمضان ..
ماعندي ولا مسلسل متابعتنة من البداية إلى ألحين يمكن من كثرتهم الواحد مايدري ويش يشوف.
8)
ويش رايك في :
*زهرة الربيع
مختفية من فتحة المدرسة
وحشتنا خفة ظلها
والله يوفقها يارب
* ملاحظ
تعجبني فية ملاحظتة الدقيقة
يعني أسم على مسمى
* كرزاية
فاكهة لذييييييييييييييذة والكل يحبها
9)
شنو اقرب طبق محبب الى قلبج ؟؟
ماتنعد الأطباق من جميع الأصناف وكل مالذ وطاب
10) ما صادفج يوم موقف مضحك داخل المطبخ ؟؟
وشنو هالموقف؟
كان أول ماتعرفة على جيراني طبخة الغدى والمفروظ أوطي على الغاز وهو على الفرن طبعا نسيت وطلعت وأخدني الوقت من السوالف والهدرة وما رجعت إلا الغدى
أكيد الكل عرف مايحتاج أقول الجدر صار أسود وإلي داخلة صار فحموطبعا تغدينا بعدين من المطعم
11) لمه تشوفين طبخة جديدة .. وتخططين انج تسوينها ..
ما تخافين من الفشل في عملها ؟؟
إذا عجبتني الطبخة أسويها على طول وأكثر شي تنجح معاي
في مرة صادفت فعلا .. انج فشلتين في طبخة ؟؟
أي
واذا كان جوابج اي ؟؟
فكرتين تعيدنها مرة ثانية .. لو صرفتين نظر عنها ؟؟
الطبخه إلي تعبتني للين ماصدتها هي المچبوس على طول كان يصير لي مضروبة وساعات أنحرج وأقول إن هذي الطبخه صج مضروبة طبعا عشان ما أنحرج
بس ألحين الحمد لله تفضلو وشوفوا
.12) شنو الوقت اللي تكرهين فيه
انج تدخلين المطبخ .. ؟؟
لما أكون تعبانة، وفي الإجازات
وطبعا أبو لعيال مايگصر
13) بنتدخل في الخصوصيات .. والج الحق تمتنعين عن الاجابة ..
لا عادي مافي أحراج ولا شي
زوجك الكريم .. يساعدش في المطبخ ؟؟
أكثر الأوقات أنكون مع بعض في المطبخ واخصة إذا كانت عندنا عزومة .
عنده مهارات مثلج .. واذا كان الجواب .. اي ..
من تعلم منكم .. من الثاني ؟؟
كل واحد فينا عندة مهارات في طبخات معينة
ونتعلم من بعض دائما.
14) نصيحة الى الاعضاء في شهر
رمضان .. بخصوص الافطار أو السحور ..
لا تكثرون من الأكل على السفرة لأن وراكم في المنتدى ركن المطبخ راح تدخلونه وتشبعون إن شاء الله.
15) كلمة أخيرة ..
ألف شكر للأخوان ( قناديل وتقنيات ) لبرنامجهم الجميل وإتاحة الفرصة للأعضاء للتعرف على بعض أكثر
وأتمنى لهم التوفيق ورمضان كريم للجميع
" ....
