شيالة آخر زمن=متطورين اطوار
ما همهم الا اللحن=والباگي كله هرار
شيالة لا مستوى=عندهم ولا محتوى
عدموا عزانا ابمرض=فتاك ما له دوى
ساكتهم اتوزنه وان=يتحچى يطلع هوا
ميشيل غير القيم=وهو في الأصل عيار
طلعوا علينا اشكثر=بلوان مختلفة
نظراتهم للخشم=ومخوخهم تلفة
تفكيرهم بس لحن=يولم على اللفة
والضربة أسمى هدف=في الموكب الجرار
ويش احچي عن مستوى=شيالة آخر زمن
اتأدى عزانا أدى=بهرارهم وامتحن
صاروا لنا مشكلة=ما ليها حل يا حسن
والضعف لا تحسبه=في الكلمة والأفكار
واحد عن العولمة=يحچي وعن التطوير
وواحد عن الفندقة=وما ليها من تأثير
وواحد عن التربية=وما فيها من تزوير
وشيال لو تسمعه=تظنه مذيع اخبار
يا موكبي أعترض=بس مو على الفكرة
أقبل الفكرة إذا=كانت تشع نظرة
مو بالكلام المسف=متنمق ابسطره
كلماته بس تنگرا=تحسبها رشق احجار
شيالة آخر زمن=كلمن يرى فنه
عن شيلته تسأله=وما يعرف المعنى
لهفان سماعته=وبالصوت يتغنى
وكل همه وهمته=وتفكيره في الإصدار
يا رحمة الله على=موكب عزا البحرين
زهوة ايامه مضت=وترجع بعد من وين
كان العزا ليه أثر=في الگلب ويا العين
واليوم أصبح أثر=من باگي الآثار
راح العزا اللي يهز=گلب المحب والروح
وراح المعزي الذي=تلگاه دمع مسفوح
وجانا المعزي الردي=لابس وهو شلّوح
يلطم على خيبته=وما يدري ويش الصار
تدخل الحلگة وترى=شبان لبّاسة
واحد يهف دگلته=وواحد يهز راسه
بنطاله خالس تحت=وامبين احساسه
امعزين آخر زمن=أشرار مو أخيار
