منهو أعظم امصيبه صدر الزهره لو لحسين
تخر لجبال من تسمع او تبچي لو تشوف العين
صدر الزهره
يجر زفرات من فاطم صدرها او صار يتكلم
عظيمه عصرة أم احسين والونه بعد أعظم
أنا ابداخلي لضلاع يوم الباب تتهشم
او لن أدموم مني اتفور سوه بي العدو جرحين
جرح إللي بهض عزمي يوم الــ نبتوا المسمار
او جرح الثاني يوم أسمع فاطم تنتخي الكرار
جارت يا علي العدوان ما تنهض يحامي الجار
عجيبه ما تحاميني وانته اللي حميت الدين
صدر الحسين
يصدر أمي أنا أكبر مصابي آه لو تدري
نحر طفل الولي فوگي يصدر الوالده مفري
او لو صبر البشر يجمع ميعدل ذره من صبري
رأيت اعلى الثرى شبان متوسدين او متعفرين
وإذا انته نبت مسمار فيك او ألم الزهره
أنا لمثلث الجاني سحب لحسين من مهره
ولا اتمكن يطلعه إلا على التربان من ظهره
دمايه خضبت لطفوف أو ظامي ما شربت امعين
يصدر أم الحسن ضلعين منك آه كسروها
ونا اضلوعي ترى كلها جو بخيول رضوها
أو زينب من تنادي احسين بالأسياط ضربوها
او سمعت احسين يا زينب يگلها يختي لا لا اتجين
يصدر الطاهره د ِ سمع شنهو الــ صار والأفجع
عليه من طحت جاني بن لضبابي وتربع
نحر لحسين أو خلاني على لحسين أتوجع
طريه أو دوم تجدد مصايب كربله ابلسنين
صدر الزهره
يصدر احسين والأدهى مصيبه لو أفصلها
شجاني منظر الكرار يوم الزهره غسلها
وجد بيه أثر للباب او دمعاته علي هلها
منهو يحتمل مثلي يسمع حيدر ابلونين
يصدر احسين يوم الــ جاك شمر أو هبر المنحر
زينب دافعت عنك او نادت يا شمر وخر
لكن فاطمه خرت عجيبه او ما نهض حيدر
ما چنه أبو الحملات حيدر قاتل العمرين
صدر الحسين
يرد إعليه صدر احسين فوگــ افراشها أمي
بگت حيدر يمرضها وينشف ادموعها الــ تهمي
لكني على التربان في حر الشمس مرمي
ثلة أيام خلوني بلا غسلن ولا تكفين
ونته المرتضى شالك مع الحسنين وسط الليل
مالك كبر او سلمان شال الصوت بالتهليل
وآنه اضلوعي لملمها علي السجاد وحده إعليل
ما حضرت إلي زينب هملت فوگي العينين
صدر الزهره
يوليدي ابگبر صدرك جميع الناس يدرونه
صبح كعبه لعشاگك أو أبدا ً ما يخلونه
ونا صدري ابگبر مخفي أو ما شوف الـ يزورونه
تدور شيعتي گبري أو تسايل عنه بو الحسنين