خذ كلامي وانه جاهل=لا ايكون اتصير عاگل
لين ما تبغي تتأذى=ابمجتمع تعبان خالص
وتسمع امنّه حچاوي=من كلام اشكثر ناگص
لا اتزيد الوعي وتفهم=ترى كل شي زاد ناگص
وعيش مرتاح ابجهالة=والتفت لا اتصير عاگل
العگل يعدم رفيگه=ويفلته بفراش علّة
ولين تبغي اتصير عاگل=اتحمّل المجتمع كلّه
أوهو ما يبغي يحمْلك=لكن ايريدك اتحمْله
وهذا يخويّك ضريبة=للذي بيصير عاگل
عيش راحتك ابحماقة=والحماقة كلها راحة
وچذّب وخمبّص ونافق=ولا تتحچّى ابصراحة
والصراحة ابمجتمعنا=أبد ما ليها مساحة
ولين تبغي اتصير عاگل=عيش ما تفتهم جاهل
لو اتسوي أقل شغلة=ولو تمارس فعل واعي
تالي في المجتمع يطلع=ما فعلته ما له داعي
ويطلب امنّك تنازل=ولازم انت بس تراعي
وكل هذا ابسبّة انك=واعي وفاهم وعاگل
أما هالمجتمع بلوة=في التعامل والتعاطي
للي فاهم سهمه صايب=وعن الأحمق سهمه خاطي
والله تعبانين منّه=ومن تفكيره المخاطي
مجتمع منتبه يزعم=للأسف لكنه غافل
أنت لو واحد امبلتع=وخوش تفلنزي ولوتي
وتشتغل من دون عگلك=ضارب المجتمع جوتي
حتى لو تحلق ضميرك=وما تخلي فيه شوتي
چان حاسب لك وقدّر=لأنك صاحب مشاكل
وخذ كلامي وانه جاهل=لا ايكون اتصير عاگل
