أريد اسأل عن الراحو ولا جو
أهل كرانة هل في الخير لاجو
أرض لا ما تضمهم بحر لا جو
هم انجوم السما ابليل الدجيّة

أهل كرانة في الأمجاد رزّة
أو كل واحد عمود الكرم رزّه
قسم لو حاتم اللي بذل رُزّه
ميعدلهم أولو جاز العليّة

مزارعهم جناين فاضت اعيونْ
سحرها دهده الألباب واعيونْ
سلامتهم من الحسّاد واعيونْ
تشب النار بيها او بالدعيّة

اذا جيت الهم ابعينك تراهمْ
مودة او حب على العادة او تراهمْ
يهل تجهلهم ابجهلك تراهمْ
صناديد الحرب يوم السريّة

صب الفنر گازاته وكتها
وصب الگاز شغلة مو وكتها
وعزِمْتي للشعر هدها وكتها
وحيّر مفرداتي ابهلقضية

شگلّك يا فنر يا نور والع
أطنطن بالأبوذيات والع
أرى گلبي ابشعر الفنر والع
وانه صادق شعوري ما هو والع
والمهجة ابچلامه ملتظية

أهل كرانة يهدونك سلامات
ومني بعد جاينّك سلام آت
إخذْ هلگلب من عندي سله مات
من اشعارك الفيّاضة البهية

فنر يحليو يا بو وجه مالح
سُكّرك انتشر في كل شي مالح
لغير الخير وجهك لينا مالح
يوجه الخير والريحة الزكية

أشوف الفنر متلهب شراره
أو في الديوان متلهي بشِراره
إجاه الصمت او ليمه ايهِبشه راره
بِنشّف گازه بصواته الخفية

يا گاز الفنر نفسي تِمِلّك
كحب الناس كل عگلي تملّك
وغلاتك عندي روحي ما تِملّك
أحبك واليحب صادگ حچيّة

أگلّك بوذِيـَة وتفوح مِنفاي
امعند الله الشعر أهداني منفاي
أو لو هاجرت ، إلى الديوان مَنفاي
أو باظل أخدمه برجلي وِديّة
الله وياك
حس الصخّة

أهل كرانة بدرٍ لا دجى جن=عليهم كلّ عاشگ بالهوى جن
ضماير ناضجة لا تنتگي جن= يا أحلى منطقة عند البرية


أبد ما منتدى يومٍ وعاني= أوهالديوان وعّيته او وعاني
وادا عنّه غبت أتعب وعاني=يديوان الثقافة التفت ليّه


أني والفنر نكتب وين فكنا؟= ترى المفترس من كل ملل فكنا
أوكل انيابه صارت مفل فكنا=أضن العشرة أسباب القضيّة

يشعر النارجيلة أنت واهج
حامي ملتهب شعلان واهج
شلون أگدر ألايم گشّي واهج
وخلي النارجيلة يحن عليّه

وديوان الشعر واجد لفتني
واتفنّن ابفتناته لفتني
لو أسبر عمُقْ غوره لفتني
وخلاني على الساحل رمية

بديوان الشعر عندي وديعة
وخبر عنّك لنِشْرَنّه وديعه
يگلْ لك كل وديع وكل وديعة
إجانه النارجيلة بخوش جيّة

راس النارجيلة الدّخنه عّله
وانحاشت من حشا الديوان عِلّه
أو عَل اللي رجع يسعدنه عَلّه
بسواليفه وحچيّاته الثرية

ادا جاك الحچي من عِدْهَه نِخله
تبگبگ لك رطب من راس نخله
وِدا منّ الحزن ما يوم نخله
نبكّرهه ونمز مزّه روية

غياب البگبگه لاذان خلها
دخنتهه فاكهة لشعار او خلها
يديوان الثقافة لينه خلها
بننطيهه مَحبتنه هدية
الله وياش
حس الصخّة

أوسال الدمع من وجناتي أنهار
عسى الله بس اشوف الزعل انهار
ونجلس بالمنتدى ليل مع انهار
حبايب دوم كل صبح اومسيه


كل واحد أبشعره المنتدى حنه
حبايب دوم ما نسمع أبد حنه
عرفنه الطيب عرفنه الخير حنه
نتجمع على شعر أوأبوذية


ودي أوصل للفنر واعطيه ورده
وسأل ربي بالسما يحفظ ورده
دافي ما يحتاج لمخدة ورده
عزيز اوشاعر ويغلا عليه

ابكل مذهب أحب الفك ومله=محال ابأي ضرف أسأم ومله
حكم يسرد مفل شيخ ومله=ضوى اعيوني أبو حنوچ الگويّه

فنر هالليل جانا يالله گم ضو=أوخل القافيّة ابگازك تگب ضو
ترى الأحباب خوش أعضاء گب..ضو=فنر ، فك مفترس والنارجيله

فنر انت سبب جملة اوناسي=أنا اوگازك منا هاجر اوناسي
ترى نورك بعد أهلي اوناسي= كأنّي گيس وانت العامريه

فؤادي للشعر هاليوم وارم
أهوى النارجيلة الحلوة وارم
شعرها الزين وأبني ليّه وارم
من الأشعار لي صروحٍ علِيّة

ستة وأربعة المجموع عشرة
گضيناها أنا وياچ عِشرة
وحبي ما ظهر كلّه بس عُشرة
وتاليها طِحت باعظم رزية

شربت اهواچ في گلبي مبارد
وانا سرت ابدرب حبّچ مبارد
ولو تبردني في حبچ مبارد
بتبقى النارجيلة اتلوگ ليّه

يفك انچان متملل أنا اسلاك=ابگديل الحب إنت ميده وانا اسلاك
متمنعني أبد حضره ولا اسلاك = أريد اتونّس ابشعرك اشويّه

يفك شوگي الك مو دنب لوعار = أجي لك ما يصدني درب لوعار
وطب للبحر بنچ الشتا لو عار = أونبحر بالقوافي اللي إهيّه

عليچ احساس يالنارجيله ماعِز
إلچ حبي لبن من ضرع ماعِز
أذل من دون بگبگتچ او ماعِز
أنا لچ وانتي يم الدخنة ليّه

لحچياتچ أنا مَنگِد وخطّي
في دربچ والفنر دربي وخطّي
أو لو تخطون بتسامح وخطّي
أهم شي انكون في دروبٍ سوية

أكِلتي حمبصيص او شربي شاهي
بجيكم ليث للغزلان شاهي
مليكي الگاز والدخان شاهي
بدون التتن وش تسوى الدنية

الله وياش
حس الصخّة

سلامتكم من اجنون اوهبالة
ترى الأعضاء والله مالهبالة
إلى الديوان شعري أوهباله
فنر والفك وروحي النارجيلة

أنا المجنون في حبكم ولا انسى
فضلكم ما جرى مثله ولا انسى
أبد لا زِلِم تعدلكم ولا انساْ
شعر كالضو على راس الفتيلة

أسايلكم ولا عندي وسيلة
غير الحب مثل لوحة او وسيلة
أعلگها ابدمع عيني واسيله
وين اترك أنا الديوان ليلة؟؟؟

حبكم في الگلب ضارب ابگوّة
أگلكم من أشوف الشعر گوّة
بوصيبع تفتخر ويّه بوگوّة
عليكم يالربع ما عندي حيلة

أبوذياتكم دشّت ابروحي
وأخاف أبگى أنا الوحدي وابروحي
يليت أشعر وأجود الكم ابروحي
رياحيني أنثّرها جميلة

ترى الديوان منكم زاد وجره
عسى الله ايعظم اثوابه او وجره
يسبحانه اللي صاغ القلم واجره
عليه الشعر يصدح بالفضيلة

راسي من اشعار الفنر منطگ
حلو منظّمْ بيانه كله منطگ
طگطگ ليه شِعري وطن مِن طگ
واخذ يرگص على نغمة حچيّه

حدّگ بالفنر شوفه حدِگ به
حط ميداره لشعاري وحِدَگ به
راد ايدِگ بي لكن ما حَدِگ به
أحبه اشماعمل بالگاز فيّه

گازك سوّى في الديوان ريحة
وهبّت على الفك في البحر ريحه
عطني امن الشعر يا فنر ريحة
وعلمّني على فن البوذيّة

شوف الليل جن بالحاس والبگ
اگعد يا فنر وياي والبگ
والگعدة معاك أليگ وألبگ
منهو يعوف هالگعدة الهنية

فنر ضاوي وليلٍ كله بسعاد
وشعرٍ يصدح بهندٍٍّ وبسعاد
مِلا الديوان هذا الفنر بس عاد
ببوذيّاته الحلوة الزهية

إذا طب الفنر ديوانّه وزار
أبفصخ له القميص وبلبس وزار
ولا راح ارتكتب بالفعل اوزار
رطوبة وحر وشمسٍ ملتظية

يها اللذي تكتب الشعر وشبلاكْ؟
إبها القلم والشعر عجب وشبلاكْ؟
شوف الدرب يا حبيبي موحش بلاكْ
اكتب درر وانثر الفرح في السماْ

هذا الشعر ما يعوزه صعب الروي
مثل النهر صنعته الشرب والروي
واللي يحب القصص سهر والروي
يجلس يشوف الشعر معاكم سماْ

والفك اذا لاحت الدرر تنسبه
والحُرّة في احمايته كفو تنسبه
هذا الذي كل فضيلة هو تنسبه
مثل الجمر يغلي من تمر تعلمه

أما التتن والفتيلة مثل الهواْ
حب او عشِگ ممتزج نسيمه ابهوى
واللي يعاديهم ابخسارة هوى
منهو يگول الرمل يطال السماْ

آنا الذي جلستي كلها مَناح
تبگيرتي وعزوتي كلهِنْ امناح
وبلوتي ووحدتي من كلّ ناح
أشكي لربّي مو إلى أهل البرية

متحسر بليلي يا خُوتي وعدّ
متى تعود أيامي وهليام تعد
أدعو يربي تحقق لي الوعد
وتجمّع شملنا بليلة هنيّة

ضوى عيوني وهواي النّارجيله
إلْ يتعدّى عليچ بناري أجي له
والفك يلعب بجيلٍ ماهو جيله
وإذا جيله أريد ايرد عليّه

يفوز اللي يحب النارجيله=أوروزكّان يهوى النارجيله*
أبد لا ماتمّس النارجيله=أوحبّك يالگدو جاري عليّه

يروّاد الشعر خليتوا الفك
وأهو مفترس يطلب منكم الفك
وانته يلگدو گِمْ شوف ولفك
تراهي النارجيلة مغازلية

نفسها اعلى الهوى الله جبلها
چيفه تغازل وأنت جبلها
عجّل يلگدو بسرعة جبلها
عصاية وجيبها بظهر العصية

هذا بس حچي يا النارجيلة
وإذا في زعل روحي النارجيلة
وخلي الفك يِحَرْْگْ بنار جيله
ترى جيله ميعرف شلقضية

وبرجع للفنر لا أنسى گوله
وباخلي الكورة وسَط گوله
وكل شي في ضميري راح اگوله
وباشبّر وباعبّر بديّه

راسي اعلى الشعر يلفنر وسّد
غمضْت العين وكل شي انصك وسّد
سد امن الشعر فايض لي والسد
إذا ما فاض من يبلغ جرِيّه ؟

بمبر في شجر هالشعر بمبر
وباحدّر امنّه تين وبمبر
ما نعصي الفنر في الشعر بمبر
أبو الگازات والهمة الگوية

گلم بيدي عليك أبيات وَنهه
على كيفي الشعر آمره وَانهَه
وسَكّن منة حزن لوليّة ونهه
وخلّي الناس تترحم إليه

حچيّك يالحنچ لذني وصلّي
حچيّك ضـو يحرگني وِصلّي
أو هسّه اعذرني بتمسّح وصَلّي
او باأدّي فرض واجب علَيّ

نكمّل هالنهج ويّاك وِدنه
وفي بانوش الشعر يا حنچ وَدنه
تصير اعيونه انته واحنه ودنه
او ناخد دفّته وننطي سويه

كرم لك كل حسينه تفل شعرها
وهل كرانه تستاهل شعرها
ودا انته تحبها أي شي عِرْها
ترى تستاهل افداها المنيه

حس الصخّة

نور الفنر چنّه تتن على راسي عان= أرد اجودي ما في أحد لأحوالي عان!
حكّا الجمر ماينوصف من الفرگه عان=أسرع عليه اوينطفي من الداهية


منهو يحد الصمت ايجي أنا مانه حاد=باخبر الفك اللي نابه كالسيف حاد
ماينجي غير اللي عگل أوعن فكّه حاد=ماحدّدت گلبي إله والى غيره حاد
أشعاره گلّه امدبّسة عسل حامية


شعر الفنر ما ينحصى أنا مانه عاد= والمنسرح ماينگدر دعدروني عاد
چنّه بلاوي نازله على گوم عاد= من نقمة الرب العلي على كلّ عاد
دايم يفاجئنا الفنر إدا لينا عاد=أفكاره تجعل دخنة التّتن زاكية

ابهالهجر يم التتن أنه مالي شوف
الفك مشى نور النظر ولا عندي شوف
يالله الفنر عدنا خطر شب گاز شوف
على اللي راح امْدامعي تدر هامية

ينارجيله الحچي ميجيب حيله
او صدگيني ترى الفك خار حيله
الظروف تباعده وماحد احيله
وظن حنوچه مفغوصه ابقضية

على الفك التحبينه أسف له
ونه اللي ايكدره ابچلمه أسفله
أباسوي حصيرٍ له وسِفله
وِنام اسبوعه ليلاتٍ هنية

حس الصخّة

اوتوي داخل الموقع وعسعِس
هم شفت الفنر مثلي ويعسعس
عسى الماعسعست عينه يا عسعَس
تعسعس بيه أشرار البرية

أنا ما أترك المرحوم تركي
وكلام السفسفة هاليوم تركي
ضعيف الناي من عندچ وتركي
زعيم الگوم صار اليوم تركي
وإذا ما تفهمي حطّي عزيّة

يا أم دخان متلون مليتي
اولوّثتي إلى جونا ومليتيه
اولو ملّوچ أنتي ما ملّيتي
اوهذي امن الصفات الأنثوية

على ام بكّار متخشّب وعفية
والله يزيدها صحة وعافية
وعنها جوّد السانك وعفْ يا -
- الفنرلا نفّرك فوگ الوطية

تحياتي أقدمّها ابإعارة
لمجموعة الأسما المستعارة
أناشدهم فلا يكشفون عاره
اليطلب ستره من رب البرية

فانوس الأبوذيات ورّى
أو چنّه ماخذ الديوان ورّة
أبوذيات بين الشين والرّاْ
دحاسب گبل ما تنفع ندامة

أشوفك داخل ابهزّة أو وزّة
كأنها حنّتك حنّت أوزة
أخيرك بين حرف الراْ أو الزّا
أو راعي الفكر من يوزن كلامه

أشوفك يا خلف چبدي وشوبكْ
وگلّك ياللذي جانه وشوبك؟
تهددناْ او محبينك وشوبك
عسى ترجع يفانوس ابسلامة

كريم الگوم لو ضيفٍ لفى اوحلْ
تشوفه ما يطلبه اجواب لو حلْ
يكرمه حتى لو وسط الخباْ حلْ
او تدري انته عن اخلاگ النشامة

يفانوس الدرب لا تظن سيده
او كل واحد فرض يحترم سيده
ترى الموتر اذا ما مسك سيده
يدش في طوفه ما بيها سلامة

يگلبي للفنر بوسات ودهه
وعيني الشوفته وملگاه ودهه
نحل جسمي صبر لفراگ وادهى
گازه يجف تصير الدنيا خرموس

الحفيد الفنر والفانوس جدّه
رجع لك من عگب سفرته جده
وكل واحد طريگ اشعاره جدّه
في مضمار الفنر عدّاي فانوس

فنر سلّم على جدك أبو بوك
أو رَيْگه من عصيده ومن جبن بوك
واحفظ له مفل ما تحفظ الأنواط في بوك
وتحفل لي أمرك تحوس وتنوس

وأي واحد اجاوب ليمه ينسال
او گازك يالفنر بالشعر ينسال
وجسمي بريحته بيدوب وينسال
ريحه طيّحت شعري ولضروس
حس الصخّة

علي اللي راح أدرف دمع ونهد=كأنّه طير يسحر وجدي ونهد
أوگلبي من رحيله انفطر ونهد=أدور عليه اوتعميني الرزيّة

كأنّ الفك هندي والشعر بان = عجيبة چيفة عن أشعارنا بان
أوعاداته ادا نكتب شعر بـان = وشوف الساحة ماهي لوليّه!!

يفانوس الركاكة الشعر بطله=أوسحر المارد المخبول بطله
أوطف ناره اونظفه يالله بطله=گبل مايفسد أشعارٍ گويّة

أنا ماخاف ضرب الرجل ولبيد=أصب أشعار من لبحور ولبيد
أوحگ الفنر تاج الروح ولبيد=لزف الحكرة للسبع العليّة

أنا الصخة الصخيخة وهذا صمتي
يگول الفك إلچ صخي وصمتي
واذا عنّه ما فكيتي وصمتي
بخلي شهورچ ثنعشرها رمضان

يم جسمٍ نحيفٍ والخصر عُود
يگول الفك إلچ أسبوع واعود
يابتي صغيرة انتي وانا عود
چم يوم اصبري وهفي الدخان

هفّي دخنتچ واحسبي الحسبة
أنا كالفك بعد يومچ أحس به
متنفع معرفة تالي وحسبة
يمتى الفك يطب لينا الديوان

او بازيّد أنا امن الشعر شگه
اگرا دفتري ون ما صلح شگه
انا اللي موصّف نْسيره وباشگه
وكاسر من وشوا بيّ الحسودين

أبغرف بالزبيل اشعار واهوش
او باحطها في راس اللي بغوا هوش
مفل دخانش السوّى الهوا هوش
اوبحكر حلگه وعيونه بدخاخين

ثلاثه واربعه واثنين تسعه
اودخانش في جسمي حية تسعى
أريد آشيله بس روحي ما تسعه
وريد گلوب عشر امْية وشرايين

جسر مابينّه للود لمِدّه
عسى بش التگي واگعد لمُدّه
ولگمش عيش من مّده لمَدّه
وضوگش طبخة الباچة بكراعين
حس الصخّة

أشوف الفك طلع من دون ماردْ
وانا اعلى اصغار يا خِلاّن ماردْ
وهالفانوس لو مليون ماردْ
يطل منّه تظل روحي گويّة

أنا والنارجيلة التاج بالهامْ
ولا نحفل أبد يا خلگ بالهامْ
يهددناْ الضعيف او حنّه بالهامْ
يجيناْ الشعر جمراتٍ لظيّة

يحس الصخّة لتناطح جبلناْ
ترى رب البشر بالسم جبلناْ
أو لو جدول تخاريفك جه بلناْ
نصب الدم ولا اندوس الدنيّة

مهي حلوة تذوگ العسل بالسمْ
ترى لو طاف حتى الجمل بالسمْ
متوصل للگمر هالبان بالسمْ
دروح ابعجل لا اتشوف الرزيّة

صدى حسّي أنِخْ به اهنه وحطّه
لي ديوان الثقافة باب حطه
اليرفعه أرفع واحط اليحطه
انا صح صخّة لكني گوية

الشعر تركية بوداني تعلّگ
اوطربوشٍ على راسي تعلگ
اوحس الصخة ايصمّخ تعلگ
وصدى صوته يگض سابع علية

لتتعجّب ، نعم للصوت صخّة
مهكو الموت اجي للحي اصخّة
ودا جاك الفزع في يوم صاخة
تخسبگ بالك او مالك حمية

لتتطنز عليها صخّة الصوط
ترى اطّنطن تغوص ابوِدنك اصّوط
وعلى صماخك بتلعب رنگة الصوط
ولا تفكّك طناطنها الخفية

كلامي ابحرف أقومس به ونَجده
وفرّس به على كيفي ونجده
وفي وگت الشده ليه اسعاف او نجده
اهلاله الأحمر آنه وصيدلية
حس الصخّة

أنا الفانوس مانه أيّ واحد
أگطعْ شعري من لسيوف واحد
أحوّط منطقة امن الشعر واحد
وما حد يگرب حدودي المنيعة

أنا الفانوس أجِزْ بالشعر واگطع
وشعري أحد من لسيوف واگطع
واذا تبّي أگطّعْك اگطع اگطع
تگرّبْ لو تبي عمرك تبيعه

تريّثْ يلفنر واعرف من آنه
أجيب الشعر في وگته ومن آنه
ولا ليكم عليْ فضلْ ومنانة
يصيف الشعر بس آنه ربيعه

لعد بكر ابن غانم برز أكبر=وآني والفنر من شعرك أكبر
بغيت الفك لنّي رايد أكبر=أوهالفانوس مايگدر عليّه

بدل ما تطلبين الفارس الفك
من الفانوس طلبي الراحة والفك
وگولي للفنر مهواك اوولفك
خل يحضر إلچ گبل المنية

أنا اتعرفين كراني وكرّه
شديدٍ ما بعد يحتاج كرّة
وأديبٍ فايض ابلشعار كُرّه
واشعاري غصاينها نديّة

تريد الصخّة يغلبني وانا حس؟!!=شعوره جامد املولح واناحس
يرجّيني ابكتاباته وانا حس=أوغير المفترس مسمع حچيّه

واذا الفك ما لفى لينا ولا جا
يصير اتّركي هالبحر او ولاجه !
بدونچ لا بَ لا هاءٍ ولاجه
ولا تحلى حروف الأبجدية

يگول الفنر شعري بيه إضعاف
وأنا أحسن امنّه بعشرة أضعاف
أنا الفانوس ماهو من هلضعاف
گدو ومنگاش ذوله الشِّگَرْدية

خل يدري الفنر من هوّه آنه
ويصحّح علمه من وگته وآنه
أنا دولار غالي وهوّه آنة
وبعده ما وصل حتى ربيّة

كل ظاعن رأى حيّيْ برك به
بضيفه وأكرمه هوّه بركبه
وضيفي على كرسي العز بركبه
واخدْمه ابإيدي وعيوني سويّة

أكيد الفنر مني بعده ما هاب
وإذا ماهاب مني وينه ما هاب ؟!
وإذا في بيتهم نايم وما هاب
خله يشاخر ابنومة هنيّة

أتى الفانوس بشعاره وجبهه
وفتح ديوانكم ساحة وجبهة
گطع فرسانها ابشعره وجبها
وخلاها توْلوْلْ من حچيّه

جال وصال طشّرها ونثَرها
عروسه الحرب والأحرف نثِرها
وشعِرها فاق في الروعة نثِرها
كنايات وصور واجد گوية

أنا الفانوس وكرّانة إلي دار
أحرسها ابضوايه واللي لي دار
أدُورِنْ له واصفْگه فوگ ليدار
واحرگه بنار فانوسي اللظيّة

طير يالفانوس بالمارد وحلْ به
فوگ لزراعة وخذلك تيس حلبه
هالقلم ماهو قلم تقدر تحل به
بريته ما ترسم اخطوطٍ سويّة

شيل قشّك قبل لا يدوسك الواطي
ترَى شعرك مَهْو ابشي كلَّ واطي
وذَوقه ما يلوقنْ لا لمسلم ولا لواطي
واعذرني تراني ما أحبّ إلا الصراحة

اوحسّ الصخّه جاي لينه امغارگ
بدون اوزار اوبذنوبه غارگ
ديروح انخش ولا اطلَّ من غارگ
ترى هالگلم فوق راسك أجيبه

لحطَّك داخل الگول مثل كوره
وبدوّر راسك شِكِلْ خيطٍ بكوره
وابگبِّ لقلينَه يسمون هذا كوره
أسيرك بالشمس ورا لقلينه

يا ضوِّيگ الأبوذيات بسّك
لاتتوهّم ترى الفانوس بسّك
وهذا الباب يا بو الجمر بس سُك
ولا توگع يمنگاش ابإديّه

گدو تدري نطحت أنتَ جبلها
وآنه اللي أخوانك من جب الها
سيّلت الدما منها جب الها
دوى وشاشات منّ الصيدلية

گدو الفانوس تدري به صلابة
وما واحد گَرَب إلا وصلى به
قاموس الشعر عندي الصلاه به
ورتّل منه آياتٍ زكية

أبگرا الفاتحة وبهدي لك اثواب
وبافصِّل إلك بالشعر أثواب
أبوذياتك اتورّث لنا اثواب
گواطي امنفّرة وكلها خلية

يمنگاش أَ ْحرگه بوزك ابّيدك
يبو الجمر التفت ناوي أبيدك
أجيك اوصوتي ورور ولك بيدك
وغَـتـّـر بيك راس ام الدخاخين
حس الصخة

أگولك لا تطبّ بحر التماسيح
وروح لامّك عسى تفيد التماسيح
اولو نارٍ عليَّ إنت ما سيح
جَبَلْ ما انهار بس وقتي القضّية

سويّتوا المكان چنّه حَلْبَة
مثل الجهال لَ هدّوا حَلْبَة
ديروحوا بشرف زوروا حَلْبَة
واسعوا ابمنَاكبها إشويّة

يصوت الصخّه قولي وشْ بگ؟
أظنّ المنگاش هسّه وشى بگ
إلطم، افتح الماتم واشابگ
تونا فاهمين سرّ المودّة

گدو الفانوس غير الشعر ماخاط
وتوّه اصْغِير وشاربْ ليه ماخاط
وشِعرك يلگدو مفلات مخّاط
ِتدلْدل فوگ شفْتينك سوية

گدو الأشعار اتركها وخَلها
فلا أنت أخو ليها وخِلها
يَعَلگمها وحَامِضها وخَلها
الأبوذيّة قضيتها قضية

وإذا أنت گوي فالشّعر حَلبة
انزلْ ساحته ابگوّة وحلْ به
واگطفْ من بساتينه وحِلبه
الأبوذيات ماهي أكِلْ حِلبة
الأبوذيات فن وذوگ هيّه

سأمْت امن الكتابة وين لگواي ؟
واي آگول واشعاري تِلِگ واي
يهاب الفنر من شوفي ولَگواي
وإذا مَيْهاب خلّه ايگوم ليّه

دخلت البحر شفت البحر مَدَّه
يِمِدّ اشعار لي وآنه أمِدَّه
بگيت أكتبْ بروحي بيه مُدَّة
ولا واحد لفاني ورد عليّه

شسوي ابهلبحر تعبان صيده
وكأني ألعب أويا اصغار صيدة
وين اليوثه انخشوا وصِيده
اوين الفنر وانواره الضويّة

تدرون الفنر لاويش مارَد
خايف يستوي الفانوس مارِد
ما يحتاج أنا بيديني مارِد
كلْ مِتمرِّد وماشي ابغيّه

اذا الفانوس يسعى في بتاري
أبلعب به مثل طفلٍ بتاري
أوبخلي ناره ماتحصل بتاري
بابوذيات بكّاري القويّة

أبات الليل نايم والله وانخر
واجي الفانوس في كل صبح وانحر
أوجمري إن تدحرج تحت وان خر
بيحرگ خرباطاته الملتويه

كأنك يا گدو دوّخِتْ حالك
منهو ابهلشعر هذا وحى لك
گدامك طريگ اسود وحالك
تمهّل يا گدو وفكّر اشويّه

فكّر يا گدو بعدك ترى شاب
وأنا للحين فانوسي مهو شاب
شوف الفنر جسمه اتنكّس وشاب
وخِذ عِبرة من الدنيا الدنيّة

الدنيا يلگدو فيه چم عِبرة ؟!
وافهم زين لا فَهْمَك العَبرة
خلك ساكت وهلبحر عُبره
يبو دبّة خزف ما هي گوية

يبو بُكّار وخّر عني وروح
لخلّي الطير ميجي لك من بروح
ولا خلّيك بس جثّة بلا روح
وتبگى امبضّعة الجثة ورميّة

حِسْت الگدو حوسه وگلبه انحاس
عليه ما ردّ أنا لكنّه انحاس
أبابدّل سعَدْ حظّه بلنحاس
ومن فانوسي بادِزْ له جنيّة

عزمي كل عزم يبريه ويفِل
شفتوا الفنر عنّ احدودي ايفل
وأطل اعلى الگدو من برْج إيفل
وانا الفانوس طلاتي بليّة

انا المنگاش ما أنشرى او أنبع
واذا الفانوس جا أو ناهگ أو بنبع
مثل نهر الزلال العذب بنبع
ولا ايهمني أبو أحنوچ الگويه

إجه المنگاش بشعاره وفلّت
علينا هرار وعزوماته فلّت
فَگَرْته وچفِّسيته ولتّه فالّلت
من الفانوس هبّاته گويّة

وش لك داش ويانه يمنگاش
أحنه من حديد وأنتّ من گاش
أبانگِّش ابجسمك خوش منگاش
وحار الجمُر بچويك ابچويّه

مو كلْ مَنْ تِدِشْ له يا بو نگّوش
خاف انگطّعك تكّة على گوش
على جسمك لخلّي الضرب منگوش
وَدَمعاتك على خدودك جرية

أنا الفانوس وانتَ تْعَرْفه لا ثار
بتصفي كالطّللْ تبچيه لاثار
يمهتزّ آنه في هلگول وثّار1
وَمِتمسّك ابخطي والقضيّة

عجب ليّه أتى المنگاش يسرى
وما يدري بگص يمناه ويسره
ولا بيشوف بعد العسُر يسرا
وبالجمرات بصليه ابصليّة

أنا الفانوس يلمنگاش فارس
وبفنون الشعر حاذق وفارس2
كراني الأصل مانه من فارس
وبس كرانة ديرة تلوگ ليّه

يلله طلّع أشعارك وفنّك
ورز روحك مع الفانوس وفنّك3
وفِن بالصور أشعارك وفنّك4
ميحله ابغير تصويرات حيّة

يا فانوس ما تعرف اتكلم لرجال

انتبه للمنگاش لى جالك وجال

بيدوسك ويحوسك ويسوي جنجال

ويخليك بيدينه مطيه

ما راش اعلى وجهك ماي ما راش=وباخلّي يصيبك منّي الراش

ما عندك حچي امفلّس وخاوي=وانه مثلك فلا رابعْ وخاوي
باحشّك حشيشة گبل تنحاش

گبل تنحاش باكسّر يدينك=عليّ اغْلَطِتْ والعالم يدينك
لكسّر فوگ راسك ترسة اغراش

لكسر راسك وأفتح لعينك=بس الله اسأله اعليّ يعينك
بنگِّشْ جسمك المفگور بنگاش

باخلي عليك انگوش حَمره=وباسوي الفحم للشّفّة حُمرة
كوافيري إلك لايگ يمنگاش

ينحفان الجسم يا بو خصر بان=لأكّلك الهريسة ابعلكة البان
وطعمية وعدس مخلوط بالماش

طِحِتْ بيدي مبِتْفرْ وين فرّك=لعوچس بك ودوحِس بك وفرّك
وبكتب فوگ وجهك طاش ما طاش

يمنگاش اتركه لهرار او لمرار
لو تجرع من اگلاصاتي اْمرار
ودا مرّه تخِز آخزّك امرار
شرار او ضو بتخزك اعنية

الگعدة للگوي وللّي أوَلْ جه
بْوِج المنگاش مخرازي أولجه
وحط الجمر في عيونه أو اَلجى
إلى الفانوس اعِلْ چبده ابأذية
حس الصخّة
إششششش

رجعت وأحمد الباري على العود
وبعزف ليكم اشعاري على العود
وباخلّي الصغيرِ يجاوب العود
اوباسَكّره بلحاني الشجية

أبعزف يلفنر مقطوعة الحان
يطرْبَنَّكْ ويسلي گلبك الحان
بسّك من الرّنّة وبس من الحان
واسمع غنوتي واسفن إليّه

جاكم ابو شلاخ يطنطح

من مرضه يتعكز ويترنح

اعطوه وج مسكين يتجرح

هذا الفك اضروسه مشيوله ما يجرح

يفكر روحه قيس ابن لملوح

المنگاش بعد چبدي أحبك
وأنت واجد زين يالطيب
أقبل كل شي تگوله فيّي
يالغالي لا تزعل عليّه

لو يشيلون ضروسي كلها
بعد أحبك يالمخوصر
وما أعتقد أگدر أنساك
يابو الجمر روحك أبية

چفست ركبتي أكتب لك شعر
وشربت نارجيلة أدنّگ راسي
وبنّدت الكهربا وشغّلت الفنر
وسهرت الصبح كله والمسية

أبوذياتكم كالذهب وابهى
عسى تبگى إلى الديوان وابهى
دواوين الشعر كلها وانا ابهاْ
أشوف الشعر ما يخفت شعاعه

يآساد الأبوذيات في الكرْ
مثل نخلاوي يركب نخلة بالكرْ
عجب شنهو تصير الگطرة بالكرْ
أريدنكم تعذروني يسباعه

أبوذيات شابه امولعة بالضو
صختنا والفنر والفك والضو
أبوذياتهم فرخوا وباضو
من الأشعار أبياتٍ قوية

عسى ربي يخليهم ولا يزول
من ابنيه وصبي يُبقي اومن زول
بنفرش ليهم السجاد والزول
هلِ الأشعار والباقي سوية

مراحب يا هلا ونعمين بيكم
أريدنكم إلِيْ سلوة وبيكم
قسمت اعليكم ابأمكم وابيكم
وبالفك والفنر والنارجيلة

يالغبتون عني گلبي واجل
أقدّركم بعد يحباب واجل
ولو ما الصبر منّه عزّ واجل
چان ألحين فيكم ما لي حيلة

وصارت صفحة الموقع خلية
وصفحة غيرنا أمست خلية
بچت مثلات ما تبچي الخلية
الوحيدة الما رأت ولْدْ وحمولة

طبها القرمزي ابشعره ولهبها
وصار النار تتسعر لـ هبها
شاعر ساطي متمكن لها ابها
خيالات وصور واجد جميلة

هلا ابشاعرنا والمبرور أبانا
هلا بالقرمزي وباللي أبانه
واذا كان الشهم فينا أب آنه
أكون ابنه ولي فخر القبيلة

سلامي يوصل الـ ديرة السهلة
لشاعرنا الجديد أهلا وسهلا
شعر ماينتهي ناضب ابسهله
أو هذا القرمزي بحر العطية

أو هذا القرمزي كله لطافه=أوميسابق أبد واحد لطافه
نريد انشوف منك چم بُذية

إلى شاعرنا إيديني أمدها=أو أشواگي إليه وصلت أمدها
معاً شارك يبو النفس الأبية

مراحب ياهل السامريه
فتن قلبي من غلاكم سامريه
تلالي وجوه الخير سامريه
( هواشم ) يبلغكم اجمل تحيه

خذوني معاكم في غبة ابو شهر
ناطرك ياهلي الطيبين سنه واشهر
وبنخوتكم انا بفتخر واشهر
اقول احبكم هذا كل مالديه !!!