بدون ما أطوّل علشان عگب اشوي بيغسلون الگيطان ..مرّة ولد بتّي علي الله ايحاسبه راح يتناحس ويّا التيس يدخل والتيس ايجي ركيض ويرد يطلع عن لا يلحگ عليه اوينطحه أوعلي ماشا الله عليه مستانس يضحك واحنا ماندري يومين ثلاثة أوعلي ضل هوه اللي ايودّي الأكل للتيس لا أويدخل عليه في الحضيرة والشي العجيب إنّ التيس ماينطح علي!!والأعجب إدا دخل علي للحضيرة ايغاور التيس!!!!! تعرفون لاويش صار التيس ايغاور؟!!
لأنّ علي عرف چيفه يتعامل ويّا التيس .. فوگ الدور الله ايسلمكم كان عدنا كبّوس مال عمّال (هلمت) مفلوت علي گام اولبس الكبّوس أودخل للتيس ، والتيس بعد ماعطّل جا ركيض أوشبّب أو علي صلب الكبّوس على راسه عدل واتناطحوا ولد بتّي ويّا التيس نطحة ثنتين ثلاث لا التيس حس إنّ اگرونه تهتز عدل أيّس واتباعد دخل يوم ثاني أوجا ركيض بس نطحتين واتباعد التيس بعدين عاد اتأدّب التيس ضل من ايدش ود بتّي ايغاور يازعم ماله خلگ
.
