لا سعده الله سعيدي=ولا أناله من يهودي

عاش فترة من حياته=حمار تايه في البراري
حَلگه ما فيه حتى رشمة=وظهره من عدته عاري
منفلت ينهگ ويناطل=وهمه بس ما كل وخاري
وبس فگَتْ لحيته گالوا=هلا بالشيخ السعيدي

شافوا امن ابعيد گبة=گالوا هالگبّة مزار
ما دروا عنها خرابة=باب ما ليها واجدار
گبّة لو صاخوا سمعهم=سمعوا امناهگ احمار
مسلم ايحسبون فيها=ما دروا فيها يهودي

كان يتحين الفرصة=حتى يحصل ليه مسند
ابمجلس الأمة النيابي=وحصل مسند ويا مرگد
وهيّأوا مگعد الأمة=حتى صارت ليه مگعد
وگعد يترفّس وينادي=بس خلاص الأمر بيدي

حقق احلامه الكبيرة=وصار في موقف ريادة
وساگ سيارة الأمة=ابغير ما رخصة قيادة
ومثل ما گال المثل : ما=ترتفع إلا السمادة
الله يا دهر النوايب=من فعل نايب يزيدي

ما حصل منصب حياته=وما وصل إلا ابهمنا
ومن تعبنا في الليالي=وخوف أبونا وروع أمنا
وبألمنا أمل عمره=حصّله واحنا ابألمنا
ولا سعده الله سعيدي=ولا أناله من يهودي