طلعت اليوم روزكّان=مع الشعبي او روزكّان
وابوكوثر يصوّرها= ابكيمرة بالألوان
ويش احچي عن الدولاب = يعجز لو حچى للسان
بعد ما كان في عزّه = كأنّه گطعة من لبنان
عاثت فيه إيد ابليس= اويسمّوها يد العمران!!
أي عمران أي بطّيخ=يرضى ابذبحة البستان؟!

بعد فترة اتّصل لينا =بطل من أسرة الديوان
علّمناه وين انكون = اوجا مثل الصبح فرحان
عرفتون اللي جا منهوه؟=يا قرّاء يا أخوان؟
ابعطيكم اذا اعجزتون = علامة اتساعد التعبان
توقيعه أبوذيّة= اوصورة ماهي حگ إنسان
واللي يذكره بعطيه = راسي يشفط الدخّان

توقـيـعـه أبــوذيّــة = اوصورة ماهي حگ إنسان

مكان اتصلي فيه الناس = اوشكله في العگل محفور
وامّا الإسم يالأعضاء= بسم أغلى واحب لشهور
واذا تسأل عن الموقع = على ايساره ثمر وبدور
ابوجهه مبنى للأجيال = بالنسبة إلك مشهور

ازراعة كانت احليوة=إسمها شين اوهي زينة
كلها انخيل مصفوفة=تسر گلب الهوى اوعينه
وليها احضار في كل يوم = تحرگه الشلّة الشينة
اوفيها حجر ياما اهرار=عنّه سطّروا لينا
أريد اتسمّي هالدولاب = ولا اتسايلني في وينه

إذا مهجتها تتگرگع = بعض الروس تتگرطع
چم شايب بلا ريّوگ= گابلها اوضل يرضع
جواب المسألة موجود = ابمن حاچاك اذا تسمع

حچيك ذهب وحروفك ألماس
يانارجيله كلك إحساس
والشعر عندك حلو لجراس
جيگات متروسه مهو اگلاس

هل ترى غير قريضي لجّة الإعجاز جاز؟
فهو نسرٌ والذي جاد به الخبّاز باز
إنّ في قصديَ سرّاً يجعل الألغاز غاز
والذي خلف سطوري يقرأ القصد فطين

غير شعرك يا عزيزي الغول في الديوان وان
منته شاعر مثل ذاك اللي على النسوان وان
يا أديب الشعر منّه ابروعة الأوزان زان
هاك من (چوچب) رويته ابفيض وجدانك يعين

ما رأيت الا قريض الغول عالآداب داب
لنّه شاعر محترم باخلاق في الآداب داب
ماله غير ابداع فنّي صار للآداب داب
ملّك اطراف الشعر مو من جهة ومو جهتين