بدون مقدمات وكلام فاضي :
نبي الله يونس ابتلعاه حوت
وبعد مدّة طلّعه وخلاه ايفوت
واحنا مو بس حوت بالعنا أحوات
في ظلام ابطون ما فيها جهات
تشوفنا حيين لكنا موات
في وضع لا هو حياة ولا هو موت
مبتلين ابحوت يبلع في الأرُض
واحنا فيها من شبر ما لينا حض
وحوت في كل شغلة صاير معترض
امكيّف اعلينا ايدخّن بالچروت
وحوت ميواطن بحر باي مسألة
بزعنفتّه ايگوم يدفن ساحله
ويفتح ابخيشومه منه ساح اله
واحنا في بطنه جواعة انريد قوت
وحوت ايشيل ابكيفه وبكيفه يحط
هذا موته يبلع آبار النفط
ويا چم من حوت صاير مرتبط
والسمچ وسط البحر ساكت سكوت
شلون ما يسكت وهو شايف حنچ
فكّه متبطّل ويزورگ بالسمچ
عن بحرنا ما يفچ وما له فچ
وما أحد يگدر من الساحل يفوت