منذ قديم الزمان، كان للقصة الأثر البالغ في تكوين شخصية الطفل وتثقيفه.. فبالقصص تستطيع الأم سرد كل ما تريد من نصائح وإرشادات على طفلها دون أن يشعر هو بذلك.. وأن يستمتع بذلك في نفس الوقت.. ووقت النوم هو أفضل الأوقات بالنسبة للأطفال لسردها..
ولنحفظ تراث قريتنا من الإندثار أقدم لكم مجموعة من القصص التي كانت تذكرها لنا أمي أيام زمان، طبعاً خليت الماما تسردهم عليّ ودوّنت أهم الملاحظات.. مع كتابة الجمل المثيرة اللي تقولهم..
لا ننسى أن بداخل كل قصة خُلاصة أو حكمة ما.. تُثير في نفس الطفل بذرة طيبة لخصلة ما..
نبدأ مع أول القصص وأفضلها بالنسبة لنا
نــتيــف نتــيفـــان
على لسان أمي:
حتى تصلون على النبي، وما تنسون إمامكم أبو الفضايل علي.
الجماعة اللي وياها: ما ننساه ولا ينسانا إن شاء الله.
عنكم وعن كان هذي مرة فگيرة، ما تجيب أولاد.. ومن حسرتها عليهم گامت أخذت ليها سبعة أگراص خبز، واشترت ليهم فراش نفس فراش قسيم، وأخذت ليهم منز، وأخذت الگراص وحطتهم في المنز..
وظلّت تنز تنز تنز، ليل ونهار، عشية وإبكار، ما تگوم إلا حزّة الصلاة حتى غذا رجلها يجيب ليها بارز، العشا يجيب ليها بارز..
وكت الصلاة تگوم تصلي وترد لشغلتها، تنز تنز في هذاك المنز.. نامت أياديها مسكينة من كفر المنز ويبسوا..
ألحين گامت داك اليوم، ما شافت إلا مرة طلّابة دخلت بيتهم وتگول: يا الله من مال الله، رزگونا من ما رزگكم الله..
الحين هي گالت في خاطرها جيفة أگوم عن أولادي "هي كانت تسميهم أولادها، الله جعلهم ليها أولاد" وردت گالت الطلّابة: يا الله من مال الله، رزگونا من ما رزگكم الله، إلا تگول ليها: چيفة أگوم أعطيش وأني أمبي أنيّم ولدي؟! إلا تگول ليها الطلّابة: صوبة عاد ولدش بجودش عن لا تعطيني المكتوب؟! روحي جيبي المكتوب وأني بانوزه لش..
گالت ليها: أني أمباه ينام، وأني ما سويت خمّتي، أمبي أصلي، الحين گريب بأدن الادان. إلا تگول ليها: يالله گومي عطيني... وگامت تروح تجيب ليها المكتوب... وهذيك الطلّابة گعدت صوب المنز.. گالت في خاطرها: أني باشوف هالولد.. وفتحت الفراش ما شافتهم إلا هم سبعة أگراص! إلا تگول: يووووووووو! ها ولادها؟! استغفر الله ربي العظيم.. گامت نتفت الگرص وإلا هم مستويين سبعة أولاد.. ستة أولاد والسابع صار بليّه أدون، عنده أدون وحدة..
الحين جت هديك بالمكتوب، إلا تشوف العريش مشحون أولاد.. إلا تگول: يووووووو! من وين جبتين ليي هالأولاد؟! إلا تگول ليها: أني فتحت الفراش إلا هو خبز.. گرصت هالگرص وطلعوا هالأولاد. وگالت للفكيرة سالفتها... وگالت ليها: هذا خير من الله، من حسرتي على الجهال اشتريت هالمنز وهالخبز وظليت أنوز حتى أياديي باغية من كفر النز، من كرم الله.. الله ما يعسره شي واستانست.
الحين كبروا واستانسوا، ويوم كبروا گالوا ليها: ما عندنا خالة؟! ما عندنا عمة؟! ما عندنا أحد نروح له؟! كسروا خاطرها.. گالت ليهم: عندكم خالة في بلد الواق واق. لبستهم الفياب الجدد واشتروا ليهم حصنة إلا هذاك إلا ما عنده أدون اشتروا له تيس ..
حمل تيسه گدام وتمشوا.. گدامهم هو، وهم في وراه. گال ليهم: أنا باصير گدام وإنتون في ورايي عشان نروح لخالتنا.. گالت ليهم أمهم: ودعتكم السميع العليم، ودعتكم الله، يلا تيسروا.. الله ييسر عليكم.. وسلموا على خالتكم.
وراحوا.. هذاك يمشي بتيسه.. وهذلاك بحصنتهم... وتمشوا ووصلوا، ما شافوا إلا بچودة جبل أرفع من هالبيت!! وهذاك تگدمهم.. دار وراه ما شافهم.. ما عرفوا يطوفون.. ترحرحوا وما جوا! گاموا يزعگون: يابونة يا خونة، الحگنا.. يا خونة يا بونة، الحگنا يا نتيف نتيفان.. الحگنا يا نتيف نتيفان... جه ليهم نتيف نتيفان گال ليهم: لا نا بوكم لا نا خوكم لا نا شارب من درة أمكم.. جه.. گال: تيسي يگزّم وأنا أگزّم.. لااااا گام وهدم هذاك الجبل وسواه شارع وطافوا عليه..
وردوا يمشون، هو گدام وهم في وراه، ردوا شافوا جبل كله أبر.. ما عرفوا يطوفون.. ترحرحوا.. گاموا يزعگون: يابونة يا خونة، الحگنا.. يا خونة يا بونة، الحگنا يا نتيف نتيفان.. الحگنا يا نتيف نتيفان... جه ليهم نتيف نتيفان گال ليهم: لا نا بوكم لا نا خوكم لا نا شارب من درة أمكم.. جه.. گال: تيسي يگزم وأنا أگزم ...لااااا گام وهدم هذاك الجبل وسواه رصيف وطافوا عليه..
وكملوا، كلما ما تعوّگوا نادوا نتيف نتيفان وحل ليهم المسألة.. وعگب مسير طويل وصلوا السِيف.. وصوبه شجر واجد.. وصوبه عريش.. گاموا دخلوا العريش وگالوا للمرة إلا هناك: إنتين خالتنا؟ گالت ليهم: أي.. واستكبلتهم وحببتهم وحضنتهم.. وشمّت نتيف نتيفان وحبته وحضنته.. وگالت ليهم ربطوا حصنتكم في الشجر.. وگام كل واحد ربط حصانه في شجرة حتى نتيف نتيفان ربط تيسه.
وهو من أول ما شافها عرف إنهي ساحرة "وهو نتيف نتيفان أسحر منها.. لكنه خيّر ما يسوي شيء
" گامت گالت ليهم: اليوم الغذا في بيتنا عدل؟! گالوا ليها: أي... وگعدتهم في المجلس وراحت سنّت أسنانها وسوّتهم مفل الجفر.. لكن ما گالت ليهم إنهي تبي تاكلهم.. صكت عليهم باب الحجرة وگفلته.. وراحت جابت ليهم عيوش: برياني ومحموص ومندي ومچبوس وبحّاري عشان يسمنون.. وراحت تكمل سنان أسنانها.. 
لكن نتيف نتيفان فهم ليها.. وگام سوه حفرة في الباب رنگة الباب الصغير.. وطلّع أخوانه منها.. وگام حفر حفيرة عودة چان لين طاحت ما تطلع منها.. وحط عليها أعواد أسكريم وألواح ضعاف چان تتغبّى الحفرة.. وتهاربوا..
جت الساحرة تبي تآكلهم ما شافت إلا الريش... گالت: هذا أكيد نتيف نتيفان إلا گال ليهم.. وشافت الفتحة إلا نفس الباب وگالت في خاطرها بلحگ وراهم وباكلهم... وما طلعت إلا بطيحتها.. وتعفرتت وماتت..
رجعوا الأولاد لأمهم وگالوا ليها: هذي خالتنا إلا گلتين لينا بها؟ طلعت ساحرة وتبي تاكلنا.. گالت ليهم سامحوني يا ولادي.. أني ما عندي خوات لكن ما أحب أكسر بخاطركم من جدي گلت ليكم: عندي خت في بلد الواق واق.
انتظروا بقية القصص في العدد القادم
.. والي عجبني من التعديلات 
جذي الشغل والله بلاش 
حصري..
أخت طفولة
..
..