السلام عليكم اخواني جميعاً

اولاً اعتذر لكم عن انقطاعي عن المنتدى بسبب ظروف بسيطه والحين أنا جيت وحاظر إلى أي سؤال وعيوني لكم شباب..

الموضوع هو: حماية السيارات في فصل الصيف. بس اسمحو ليي بتكلم بالعاميه..

1- السرعة الزايدة: تسبب تلف بعض أجزاء المحرك فمثلاً: يمكن احنا نقول الحراره عندنا مثلا الربع بس لا ترى المكينه يصير عليها لود وتخيل حرارة جونا في البحرين والمكينه يصير فيها احتراق داخل السلندر يعني حراره في حراره فالسرعه هني تأثر على الهيد ((HEAD)) الهيد طبعاً فيه قطع نسميهم ((والات)) وهي الكلمه ((VALVE))..

الهيد معرض في فصل الصيف الى عدة اعطال منها تأكل الهيد اول انعواج الهيد واذا انعوج الهيد او تأكل شنو يصير ؟ تخلط المكينه شلون تخلط المكينه الهيد فيه فتحات مرور الى الماء فيقوم الماء ويختلط ويا الايل وهني تخلط المكينه فلا بد من تبديل الهيد.

2- الريديتر: يجب علينا يومياً نبطله ونشوف الماي الي فيه قصر او لا في بعض الناس يقولون لا ما قصر لئن ماعندنا تسرب ماي صح مافي تسرب ماي بس يتبخر شي قليل من الماي بسبب الحراره فلو بتلاحظ خذ كأس ماي وخله على المكينه وهي تشتغل بيصير مثل الدخان وهذا من خارج المكينه فشلون الماي الي يدور داخل فتحات في المكينه يتبخر قليل فهني لازم نلاحظ الى الماي كل يوم بيومه ويفضل ان احنا نخلي الماي المخصص الى الريديتر وهذا الماي لونه اخضر ومقاوم الى الحراره وما يعرض الريديتر الى التاكل.

3- إطارات السيارة: بنتكلم فيها عن وقوف السياره في المكان الحار مثلا في بعض من الاخوان يجي ويركب ويبركن فوق رصيف واطارين فوق الرصيف واثنين تحت هذا يسبب انعواج الاطار ويؤدي الى الاهتزاز اثناء المشي بالسياره (( بلنس )) مو بس الاطارات مثلاً الجامبينات الا هم ماصين الاهتزار في السياره مصنوعين من حديد فأنت لو بتلاحظ حديد حار بيوقف في محل مائل راح يميل الحديد تصير فيه خاصية التشكل يعني ينحني او ينعوج فهذا يأثر على السياره من الاسفل الي احنا نقول عنه (( السدر )) بيكون هزه في السياره بتسبب الى تأكل الربل واذا تأكل الربل بتكون اصطدامات الحديد وبيتلف عندنا سدر السياره

4- المكيف: يجب ان نلاحظ الى عدة اشياء اذا كانت السياره تمشي ما نشغل الكومبريسر يعني وانت مشغلنها وهي واقفه شغله لاكن مبند وانت في سرعه مثلا تشغله هني يخترب الكومبريسر مع الايام شلون يخترب الكومبريسر : الكومبريسر موصل ويا الي نسميهم سيور المكينه فأنت ما شغلت الكومبريسر من اول ما شغلت السياره وانت تمشي طبعا بتكون سيور المكينه تتحرك (( تفتر)) وبتشغل الكومبريسر فبيتحرك بسرعه زائده فأذا تحرك مره وحده بسرعه زايده بسرعه بيخترب بيصير عليه لود يعني عزم زائد فلازم نلاحظ الى هذا الشي ونشغل المكيف واحنا مشغلين السياره .
هذا كل الي عندي واتمنى الي يحب يضيف اي معلومه او يصحح اي معلومه يتفضل ويشارك..

واسمحو ليي على اني تكلمت ليكم بالعاميه لئن احس بيصير فهم اكثر واعذروني..

المخلص دوماً (( بوعبدالله ))

واليكم مني صورة الى سيارة المكيانيكي

[attachmentid=23327 name=Image_071_.jpg]

مشكور .. أخوي ..
خوش موضوع صراحة ..
مفيد وايد ..
بارك الله فيك ..

رغبة من أحد الاخوان..

طبعاً ستكون تابعة الى الموضوع (( نصائح عامه))

كيف نحمي سيارتنا من الرطوبه وحرارة الشمش وما شابه؟

المشكلة الأولى: الرطوبة:
الحل: عدم إيقاف السيارة في الأجواء الرطوبة إلى مدة طويلة.

ولكن: شنو الحل اذا كان ما عندنا ((طبيلة))؟
الحل: هناك نوع من الباليس يستخدم الى جميع انواع السيارت وحسب خبرتي في هذا الباليس بصراحه تاااامه وبدون مبالغه تقريباً افضل باليس استخدمته طبعاً بيكون حامي عن اضرار الرطوبه الي تصير في السياره تلاحظ سيارات السقف مالها فيها مثل البقعه هذا بسبب الرطوبه أولا والغطاء المصنوع من الطربال.
ثانياً الباليس الي تكلمت عنه اسمه ((سوناكس)) يوجد بعدة الوان ويفضل ان تشتري اللون الي يناسب لون سيارتك الالوان الموجوده 1- ابيض 2- اسود 3- احمر 4- اخضر 5- كحلي الخ. قيمة هذا الباليس 2.000 ولا يقصون عليكم يقولون ليكم بدينارين ونص.

ونصيحة مني الي يبي يدوم جسم سيارته ويستانس منه على طول يضربها يومياً باليس ناعم وما عليكم من الي يقول يطير اللون او يبهى لئن الباليس الناعم خصوصا اذا كان لون السياره المقصود تنظيفها يحافظ على الطلاء الخارجي الى السياره ويعطيه لمعان اكثر ويحافظ عليه ويمنعه من التصدي.

المشكلة الثانية: الشمس:
الحل: النصائح الى حماية جسم السياره من التلف هي: غسيل السياره والجسم الخارجي لها حار وعدم تعرض السياره الى اشعة الشمس الى مده كبيره.

المشكلة الثالثة: المطر:
الحل: ماء المطر يسبب تلف جسم السياره بشكل سريع جداً فيفضل استخدام الباليس الى السياره بشكل متواصل في فصل الشتاء لحماية السياره وعدم ترك ماء المطر على جسم السياره الى فتره طويله لحماية جسم السياره من البقع الصغيره.

وتحياتي إلى جميع الاخوان وتسلمون لي وعساكم على القوة..

مشكور أخوي الميكانيكي
والله بصراحة جهود جبارة ومشكور على هذه التعليمات المفيدة ..

بس عندي سؤال بخصوص المكيف:
إذا السيارة واقفة في بسبب الضغط في الشارع ..
هل من الأفضل نترك المكيف شغال لو نبنده ؟؟
ولو كانت سيارتي قديمة - تمشي وتساعل - عادي لو خليته شغال على طول ؟؟
يعني ما يأثر على المكينة والهدّ ؟؟

وشكراً لكم

بس عندي سؤال بخصوص المكيف:
إذا السيارة واقفة في بسبب الضغط في الشارع .. هل من الأفضل نترك المكيف شغال لو نبنده ؟؟
ولو كانت سيارتي قديمة - تمشي وتساعل - عادي لو خليته شغال على طول ؟؟
يعني ما يأثر على المكينة والهيد؟؟

ج:اذا كانت جديده السياره: ما في اي تاثير على السياره وهي واقفه في ازدحام شارع على المكيف بس بتلاحظ تقل برودته وهذا شي بسيط لئن الي الكمبريسر بتكون لفته قليله غير اذا مشت السياره والكمبريسر افتر اقوى يعطي بروده اكثر.
2- بخصوص السيارات القديمه: طبعاً من تشوف مؤشر الحراره ارتفع فوق فخذها قاعده
ان لازم تبند االمكيف وتشغله اذا بتتحرك لئن بيعرض الهيد الى الانعواج من شدة الحراره.

تحياتي لكم جميعاً

أخي العزيز الميكانيكي،

بارك الله فيك، وشكراً لهذه المعلومات القيّمة جداً

فعلاً، موضوع يستحق الزيارة

مع خالص التحية،،

بارك الله في مسعاك أخوي الحبيب الميكانيكي

بصراحة كلماتي تعجز عن شكرك ..

بصراحة معلومات وافية ومفيدة ,,

وأتمنى أنّ يستفيد منها باقي الأعضاء الكرام

على فكرة سيارتي وانت بكرامة مخرفة زين فيها مكيف أبو كلج

مشكور يالأخو ..

ملاحظة .. على ذكر سيارة الميكانيكي .. مو يقولون البي أم دبليو ما يصلحون في الصيـف ؟ و انت شرايك دام سيارتك بي أم و ميكانيكي ..

شكراً مقدراً والله هذا الجهد المبذول الطيب ،،

أخي الميكانيكي لقد تم تثبيت هذا الموضوع وعملنا بعد الأتفاق معكم بنر
ليكون هذا الموضوع مرجع قوي بأسهاماتكم و يكون موضوع مفيد ليعلمنا :
كيف تحمي سيارتك من الرطوبة والشمس والحرارة ،،

أخواني المعقبين الأفاضل ،،
طبتم ; وأشكركم على هذه المعلومات أولاً وعلى تفاعلكم الدائم ،،

شاكرين لكم جميعاً هذا الجهد ،،

Satellite

السلام عليكم احبائي

بالنسبه الى الاخوان اتشرف بهذه الرود الكريمه واتمنى من الله ان لا اقصر عليكم في اي سؤال او اي معلومه وساعطيكم كل ما املك من معلومات

وبالنسبه الى الاخ الي ذكر عن السياره ان ما يصلحون في الصيف:
ترى في سيارات من نوع بي ام دبليو صح ترتفع الحراره فيها
لكن اذا السياره مضبظه على الاخر ما اعتقد تروح الحراره فوق
واذا تبي اثبت لك بخليك تشوف بعيونك ان الحراره عندي انا ما تقوم
فوق وشرط تشوفها تحت الربع بس يبي ليها كم شغله وتصير مضبوطه على الاخر

وسلامتكم احبائي

تسلم أخوي الميكانيكي والله يعطيك ألف عافية
والله بصراحة معلومات جداً مفيدة
ونتمنى لكم التوفيق ..

السلام عليكم

شكراً لك أخي الميكانيكي على هذه النصائح المهمه والله يگويك .

هناك سؤال اخي الميكانيكي هل الطربال الذي يُصنع في المحلات صالح لتغطية السياة ؟؟؟

السلام عليكم ورحمة الله وبركاته،،،

الأستاذ الكريم الميكانيكي،
سلمت يمينك تلك التي خطّت هذه الأحرف،
وبـوركـت تلك الأنامـل الـتـي أدعــو الله أن
توفّق لحمل كتابك بيمينك في يوم الورود.

فعلاً؛ الموضوع في تسلسته وترتيبه تحفةٌ
أرجو للجميع الاستفادة منها.

نحن في انتظار المزيد من مواضيعكم القيمة.

والسلام عليكم ورحمة الله وبركاته

مرحبا ميكانيكي
صراحة معلومات مفيدة كلش
الله يرحم أبوك وأمك على هالمجهود المتواصل والجبار
الله لا يحرمنه منك وعساك على الگوه دوم
صراحة تستاهل بوسه

السياره تبغي شاره=حگ تخترب وتبنچر
ومنك تريد مداره=وتدوم لك واتعمـّر
ارطوبه ويـّه حراره=تعدم عدام الموتر
اتچيـّـك السياره=كل يوم واللا ابتخسر
دبـّـر لك ايـّـة چاره=وشوف المكينه تحتر؟؟
چان المكينه حاره=إلحگ على الرديتر
وبدل الزيت ابشهره=ولبلاكه ويـّـه الفلتر
وانچان فيهه اضراره=سوهه گبل ما تكبر
ومش عن بديها غباره=وضربها باليس أحمر
الموتر چدي أسراره=سوهه ولا ابتتضجر
تحياتي
صوت الصمت

مرحبا أخوي الميكاميكي
بصراحة مواضيعك أكثر من قيمة
وأنت تستحق كل هذا الشكر والثناء
ونتمنى لك التوفيق

مشكور اخوي الميكانيكي .. على هذا المجهود..
ويعطيك الف الف عافيه ..

تحياتي
دموع الليل

سلام عليكم
انا عندي سوال ممكن ؟؟؟
بخصوص صرف البترول هل الحراة الين نازلة تصرف ازيد انا الترمستات مشيولين والحرارة تحت صدق يزيد الصرف جدي ومو زين الى المكينة

الف الف شكر

مشكور .. أخوي ..
خوش موضوع صراحة ..
مفيد وايد ..
بارك الله فيك ..

السلام عليكم ورحمة الله وبركاته،،
ابغي اسأل اشرح ليي اذا واحد بلغم سيارته وش المفروض اسوي عن التيربو مايحتاج اقول شكلك تعرف كلشي

الف شكر على النصائح المفيده
والله يعطبيك الف عافيه