يفك المفترس أشرف وعَـز لك
طلـّـگها وعليك الطـم وعز لك
أعلام ارتأت نفيَـك و عزلَك
لأنْ أمثالك ازيادة دودية

منـّـك مالّه ومتأذية لبحور
وقريضك فشلَـه منـّـه ومرضى لبحور
تظن لُـب معدنك بلسم ولـُـب حور
ودارك مختلف جـِـن البريّـة

يبضعة موقفي أشرف واعز لي
واذا ما يعجبك موقفي عزلي
شرف حگي إذا تبغين عزلي
وإليچ الذلة وآنا العزة ليّة

أشوف البضعة عارت فيّ عورة
عميه اعيونها لو هيّ عورا
بحول الله بكشف منها عورة
وبانوهشها بحنوچي الگويّة

يفك دورك خزي ودربك مشينه
ويراعك فيها گصـّـاصه مشينه
يولد ابليس عن دربك مشينه
المشي بدرب الزلگ يشطفن بيّه

رزحت سنين وانته تكتب أشعار
لأمة حتحتت من راسك أشعار
تالي يجيك منها انذار واشعار
وقرار الطردة باجماع البرية

يبضعة يا دليعة عني جوزي
وخطّي لين شفتي الفك وجوزي
أبَوْجِزْ موقفي ابچلمة اووجوزي
سهل ، واضح ، نقي ، صافي النية

گضيت اسنين بالأشعار طردة
على الأمراض اگص هدا واطر ده
وش عاد الجزا لو كان طردة
فخر لين انطرد من جاهلية

يبضعة راح أكتب دون وگفة
وعلى مثلچ أباحلّگ ابوگفة
( يعچتوفة )اگعدي وخلي الوگفة
إلى المفترس طاعون المنيّة

أشعار المفترس مو مثل لَشعار
يبضعة الفك إلش عز ماهو لِش عار
أبد ما همّهِ الإنذار ولِشعار
ولاتزرزحه زمرة جاهلية

دارك من گزاز أحجار محذوف
كما طاريك من لستـتـها محذوف
وسكوتك بالتهايم دوم محذوف
عضو و ما تمتلك فيها عضوية

بالمعروف مرها لا تمرني
أني گاسيت بسـّـي لا تمرني
بمر اعليك وانته لا تمرني
خنـّـفــهَم سبب حل هالقضية

خنـّـفهَم يفك نرتاح منهم
في هالعيشة شگيت اسفاف من هم
هالنوبة السلامة حليف من هم
شبعت أمثـّـل أدوار الضـّـحية

يبضعة بيتي مبني من حجارة
ولا يهمني عگل مخه حجارة
عليه بشعاري راح افرض حجارة
وسفيهٍ مثله ما يحجر عليّه

سكوتي أبرى من بتّار گاطع
يسوّي الچاي بالتخدير گاطع
أباواصل عليچ ومانه گاطع
لحد يا بضعة ما اتنخين ليّه

محد فاهم قضايا اتصير مثلي
لأنْ غيث الفكر والفهم مث لي
على غيري ابنفاق اليوم مثلي
ترى التمثيل ما يخدم قضيّة

أشوف البضعة ما گامت وردّت
ومن طلعتها ما رجعت وردّت
أظن صكت عليها الباب وردّت
لأنّ العاصفة الهبّت گويّة

لأنّ العاصفة المفترس هبها
وأضعف قوة البضعة اووهى ابها
هبها اتگوم هالبضوعة هبها
لابد وانها توگع بين ايديّه

خسي يگدر أحد يوهيها بــضعة
لو كلّه يتجمّع ليْها بــضعه
أصلخ جلده بيديني وبضعـه
وأمسح خدّه بتراب الوطية

يعچتوف التفت للفلوة ساره
دربك من گبل چم حسن ساره
وبسمة ما لگى وحسنات ساره
ثغر عابس لگى وقسوة وأذية

بسيطة يا بضبضوعي بسيطة
الصعب ميواجه امثالچ بسيطة
لسد ابفكي اعليچ البسيطة
ولا باخلي فيها ليچ فيّة

مثل ما هوّر (القحطاني) (باسم)
ودافع عن حدوده ابوجه باسم
بهوّر بچ ، وبالتچ ، وباسم
وسم المفترس فيه المنيّة

سم المفترس سم ما له داوي
مثل صوته على الأوضاع داوي
رغم أن الوعي من حوله ذاوي
ورغم هذا ولا بطّل دويّه

حشى ما أرضى للفكفوك ينهان
لوهو غيره كان الأمر ينهان
يؤمرني أخي الأكبر وينهانِ
وعليه الأمر والطاعة عليّه

خسي ونگدر نزيح اخياس فكرش
فكرش نسكت وبِنّام فكرش؟!
يفك گوم بعجل ياالله يفك رِش
على البضعة من سموم البوذية

إذا يگوم الأسد ماحد كفو يگوم
وذا يرمي الفريسة ابرهبته يگوم
يگوم المفترس بس غيره ميگوم
وين يگوم والفارس بلية

شعرت الفك سأمني وكلّمنـّـي
و مسج مادز إلي وما كلّـمنـّـي
فلا يگول الگطيعة كلّه منـّـي
الگمر ميفارگ بكيفه العليّة

أني الكترون وذرّاته مداري
ولين الچلمة أنطگها مداري
نصحته تالي لا يزعم مداري
لجل أفعاله ما تـُـنسَب إليّ

مكينة شعري وسط الموج گامت
ودوّامة احنوچي البضعة گامت
ويوم اللي أنام اتشوف گامت
چم بضعة إذا الساحة خليّة

إذا الفك طالع ابشغله إجازة
تعاين چم عضو خطه أجازه
واذا أرجع وما أعطي إجازة
لواحد مو كفو يدخل عيّه

يبضعة غوري عني وجيبي رجلك
ترى ما ريد اگص بحنوچي رجلك
كفاية شعري يا شمحوطة رج لك
وروحي الديرة واتشكّي عليّه

غلاي وحبّي ماهو عنـّـه فاني
وعلى ودّه أظل لو عنـّـفاني
ميهم صاحبي لو عنـّـف آني
أقابل عنفه بمودّه وحميّة

سنين تشوف يا عچتوف حالي
وضع ماصخ أريده يوم حالي
تاليها الوحي يا فك وحى لي
ما أشكيك وعِدْ بعلي وصيّة

يفك باوع عليك عيون مرصاد
بشـِـركها لصطيادك طعُم مر صاد
فگ عينك على الأوضاع مرصاد
تـُـهم تتلفق اعليك وعليّ

إلك موتر بغوا ايـْـكـِسرون گيره
وطريگك حفـّـروه بالحذر گـَـيْـره
ورئيس الفسدة ماهمّه الا گيره
لرفعه اينكّس ابراس البرية

من كل محل هالتهم متحذّفة ونازلة
ضيفة شرف چنها في بيتي غدت نازلة
ابسُلّم غباء اطلعت فوگه ومهي نازلة
دشّت في كل مخ ردي ومنه مهي طالعة
وسوء المظنة درج دايم عليه طالعة
أسود وجهها غدا بس للنحس طالعه
وفال السعد من فعلها صابته نازلة

صدق فك مفترس يرعبني سنه
مدري اشكد بلغ بالشعر سنه
اظنه مدرسه والنهج سنه
وانا تلميذ واستاذي حجيه

انفتحت للشعرمنه مصارع
دخلت الحلبه بس ما نا مصارع
اشوف حروب دارت لا مصارع
نتيجتها ولا انحلت قضيه


كأنّ فيه طرف لانت قوافيه
واظن منه ترى خارت قوى فيه
اشتد ابأوله او رخـّى ابقوافيه
يمكن صادته ضربه قويه

ما أنوصف بالغبا ولابداع منـّـي سـمة
راسي لتاج الذهي وصدري إلى الأوسمة
وكعبي اعلى هام الشمس فكره الراقي سمى
عنّي اسأل البارحة واليوم وأهل الأرض
گزّيت لي ابكل گلب بستان و بيت و أرض
سرجي الورق والقلم حافر أدوس وأرض
لاهل الأرض فاطمة وحورية أهل السما

حريگة

لون الزاهي من لطباع زِه به
وعن وضعك اسماط الرضى زهبه
گبل متجيك عالچافوخ زهبه
تبط بوزك يبو احنوچ الگوية

بالك ديره لك مرصودة زهگه
مُناها من تسل الروح زهگه
گبل ما يزهگك عچتوف زهگه
ولسانك سلّه من حلگ المنية

نفوس أحقاد يا فكّي لفتـّـك
تگلـّـك لطحنك طحنة ولفتـّـك
وعشان ايهدرك احنوچك لفى التـّـك
بتوايرها بدّوسك آل أمية