وزير العمل وزنه زاد من قاموا يقربونه
او كلما يهدأ المسكين بالكرسي يخوفونه
ضاعت جملة أحلامه السيد لا تلومونه
أبو ياسر غدى مهموم بالديرة او بلاويها

كتب أشعار في لندن عن اللي دار في باله
او بس نادوه باع اسمه او سلم عمه او خاله
او قرر يشتغل طرطور او صرح هذه أحواله
معارض كنت انا واليوم هالسلطة أباريها

البطالة انحلت بعهده او خدم لبيوت نظمها
او توجه صوب بنجلادش او بالاحكام سنعها
او ما عنده أحد هامور سوى بين معظمها
بن محسن يسمونه أو بن نعرف حكاويها

مرة يصرح او ينفي عقبها بيوم ما قاله
بحيرة صار هالسيد رئيسه خربط أحواله
ينسى الولد من كثرة اهمومه او كثرة أشغاله
ما حد يشتهي ذكره البلد تشهد واهاليها

يهدد بالصحف وايقول هالمؤتمر ما يعقد
الوفاق اجناحها انكسره او بالتقفيل هو هدد
عريضة ما تشوفوها انا السيد المستعبد
قوي عليكم ضعيف اصير من ينذكر واليها

امبارك يا أبو ياسر على قولك او أفعالك
على تفضيلك المركز او طيحة قدرك او حالك
اجمع ما تريد اجمع من الذلة من اموالك
بس اذكر بعد قبرك او قيامة انت تلاقيها

وزير العمل وجه ابليت مافي گوّة اعيونه
رفع راية مطالبنا اوناضل چان ايرجعونه
وزير العمل مايحتاج بالأوساخ يغرونه
فتّش في ملفاته إذا ماتدري يامسكين

حسبالك لجل عينك يجاهد حضرة الدكتور؟
اولجل تتحقق أحلامك اويگلب حالك المعسور؟
ياصاحب كتاب اعگل ولا تغتر ابچم منشور
بعثها حضرة السيّد لجل يلعب على الحبلين

ياصاحب كتاب ارجوك لا تتسرع ابحكمك
إذا ماصادفك واحد يدافع عنّك اوهمّك
لا تحسبه خوش قائد اوتطلق في عجل حكمك
إتروّى .. ترى المؤمن ماينلدغ فذ مرتين

گبل ما تمنحه حكمك شوف التجربة شتگول
وارجع للي يفهم زين گبل ما توصفه بالگول
خير الناس من يجمع إلى عقله ثمار اعقول
أوشوف الرجل لمّن ثار ميزانه التقى والدين؟

يبان الشخص للعالم=وضوح الشمس من طينه
إذا ما اختبرته الدنياْ=أتاري الجاه منطينه!!!

وزير العمل مو واحدْ=رمز هذا لچم اوزيرْ
تشوفه عالم او زاهدْ=أو في گلبه حرامي او زيرْ

غريب العالم ابأهله=يگول اهل الغدر باعينْ
واذا جاه الفقير ابّاعْ=يولّي عنّه ابّاعينْ!!!

أو چم كنّا نشوف اوعودْ=لواحد كان في الغربة
بعد ما عاد صار اوزيرْ=منعرف شرگه من غربه!

وزير العمل لا اتلوموه=أو لوموا گبله العالمْ
على باب الرئاسة اينيخ=أو خلفه اتنوّخ العالمْ

سلام الله على البحرينْ=سلام امن الگلب عادلْ
عليها القدر حط حكمه=ميحكمهاْ أبد عادلْ!!!

چم اوزير في البحرين=شيّد وزره لوزارة
ولو عندك حبر بحرين=أبدْ ما تكتب اوزاره

چم اوزير متسافل=وللعالي يودونه
داني ملتوي بايگ=والبايگ يودونه

حرامي صار ما يخدم=وشگدْ بالإثِم موزور
حقيقة هذي ما تنكر=وصُدُگ ما نحچي به مو زور

على البحرين هدوهم=ونهبوا خير بحريني
وما ظل البلد بيها=سوى محتاج بحريني

كلما سرگوا ما شبعوا=والبوگ ابضمايرهم
چيفه اوزير مو بايگ=وصافي حوضه ما يرهم ؟!

آثام اللي وزروها=ولا الصفحات تمليها
باگوا خير ديرتنا=وما دينار تم ليها

انبر سيرة البحرين=وطالع في وزايرها
مو بس المواطن شاف=المقيم ابها وزايرها

كلمن شاف عفستها=وكلمن عرف مصدرها
وكل اوزير يعطونه=وزارة گام مص درها

واما الشعب ما عنده=حليب ايگوّي اعظامه
بس خبزة يعوجنها=ابعزةْ تجسّدْ اعظامه

يعيش اعلى الأسى والجوع=وياكل محنته بيده
وكل اوزير مستانس=وتارس بالكلأ بيده

لا تعتب على لوزير=واعتب علّذي رزّه
حطّه ولبّسه بشته=وسواه كشخةٍ رزّة

وچم اوزير في البحرين=شيّد وزره لوزارة
ولو عندك حبر بحرين=أبدْ ما تكتب اوزاره