وينچ ييمّه گلبـي حگ شوفـتچ ولهـان = وسديني صوبچ يمّه واخذينـي بلحضـان

من يوم فارگتـي وظـل خالـي مكـانچ = ومن صغري ما أمداني أشبع من حنـانچ
ما عُرْفَتْ الأمة گدر لــي ابگدر شـانچ = جيتچ وگلبي من الأمـة اشكثـر تعبـان

ما گصّرت هالأمة في هضمـي وظلمـي = داسوا على اعهود الوفا وسمّوني يا امـي
وبس الهضم والجور من هالأمة سهمـي = آل النبـي وجـارت علينـا آل سفـيـان

من رحتي عني يمّه عشت امكابد اهمـوم = ومثلچ أنا في الدنيا يا مظلومـة مظلـوم
وتالي الأمـة گطعـت چبـدي بلسمـوم = وغمّضَت عيني وگلبي اعلى حسين وجعان

أمسيت في الأمـة بعـد عينـاچ وحـدي = حاير ابغربة وما بگى الا حسيـن عنـدي
وگاسيت من بعدچ وگاسى حسين بعـدي = والله ابتلاني ابغـدر أمـة وگلّـة اعـوان

أذكـر ييمّـه گبـل مـا شلتيـن عنـي = صوتچ سمعته ايگول ضلعي انكسر منـي
صك مسمعي ولليوم ما هـو امفارگنـي = وكلما ذكرتچ يمّه هاجـت بـي الأحـزان

گالت امصابـك يلولـد نسانـي ضلعـي = وناعي وفاتك يا حبيبي صك لـي سمعـي
كل يوم أنصب ماتمي في الگبـر وانعـي = لجلك ولجل اللي انذبح يا حيف عطشـان