دخيلك بالله سمّعني=في حگ حسين چم من بيت
حِن وبستمع وانوح=ترى لدمع الحزن حنّيت

إفتح مهجة القرآن=واقرأ سورة أم حسين
واجعل دمعتك ترتيل=وصوت البسملة لونين
واختم ليلة العاشر=واقرا الفاتحة للدين
لحسين اوهب الدمعة=إذا كنت الدمع صبّيت


لازم تتلف الأرواح=لجل الظامي المعفور
ترى لطفوف مولاتك=كئيبة وسيّدك عاشور
حتى هلاله حاني الراس=وظهره منحني ومكسور
وانته تعرف الأسباب=وعنها اجواب ماردّيت

إذكر طيحة المظلوم=وخدّه موسّد ابلتراب
مثل أمّه الضلع مكسور=هو بالخيل وهي بالباب
وفاطم يوم حرگ الدار=وزينب في حرگ لطناب
جيبي الكعبة الأحزان=أنا معذور لو شگـّـيت

فصّل لي خبر سكنة=وگفت ترگب السگّاي
تصيح امن العطش يابه=باموت اعلى گطرة ماي
وينه عمّي العباس=واعدني ولا هو جاي
خلّوا كافلي ايجيني=وبشوفه أكون ارْويت

يالتسمع مصاب حسين=باصوّر لك المشهد
إتخيّل كتاب الله=وعرشه اعلى الثرى امدّد
وگلب الكعبة لوشفته=بسهم مثلث امسدّد
رفع ذاك الرجس إيده=وصك بالحجر راس البيت

الكعبة أبرهه جاها=بيهدمها في عام الفيل
وگلب المصطفى المختار=بدوسوا كعبته بالخيل
وزينب ماتشوف انهار=تشوف بعينها بس ليل
على ذبّاح أخوها تصيح=يطاغي بخوية وش سويت

وادي نينوى بطريه=واخلع عنك الأفراح
والطم والبس الأحزان=يوم الغاضرية لاح
الناعي في عرش الله=على مصاب العقيدة ناح
يشوف هلاله ويحاچيه=يهلال الحزن ردّيت

في عين الكون هالليلة=محرم بيّن هلاله
وبان حسين عالرمضى=ودوسه الشمر بنعاله
وريده حزه ابسيفه=وراسه اعلى الرمح شاله
يا ريت الصدر صدري=وبداله راسي اتمنيت