يا راس الولي عباس بسأل ما ترد اجواب
عني امغض العينين گلي شنهي الأسباب
من يوم الذي سرنا سبايا من أرض لطفوف
راسك سار گدامي بلا جسمك ولا لچفوف
يليتك تفتح اعيونك ترى شمرن حداني شوف
سهم عينك عمى عيني أو أجج بالحشا لصواب
أشوف احسين يحرسنا ويدير العين للأطفال
يميل الراس لو حرمه على الناگه جسمها مال
ونا امن أنظرك صديت ما تبغي تشوف الحال
حبيبي يا أبو فاضل أنا زينب واعز لحباب
إجاها الصوت من نحره لكن ما فتح عينه
أبو فاضل وخيچ دوم بالصعبه تعرفينه
يليت الراس مني اهناك فوگــ الطف يدوسونه
ولا جابه اليسر يسمع منچ يا حزينه اعتاب
دِ خفي اعتاب يا زينب عليكم چم أنا وجعان
منچ يختي وسكينه دِ عذريني ترى خجلان
مگدر عيني تنظركم ونا راسي على لسنان
ترى العباس ما يگدر يشوفچ ويا هلأجناب
تبغين افتح اعيوني عساها تنعمي هالعين
صعب أنظر على العسال يا زينب لراس احسين
تصير اعيوني بعيونه وسمعه ينتحب بونين
وِ وصي راسي اعليكم أنا گلبي يخيه ذاب
سهم العين ما همني ولا جسمي بگى عافر
ولا الچفين گطعوها لكن همني الحاير
بگى بعدي مع العدوان مفرد يكسر الخاطر
سمعته ايصيح يا عباس لكني على لتراب
