متبارك يمركزنا=من إنجاز كراني
الرياضة المركز الأول=الثقافة المركز الثاني

أسباع الملاعب صار=ليها في الملاعب باب
وصارت الفرق تحسب=في الملعب إليها حساب
والكل شاهد ابحگهم=ومبدي ليهم الإعجاب
فريق امهندّس امضبط=وما له في اللعب ثاني

فريق المركز الواعد=نهض باللعبة للأفضل
وصار ابحاضر اللعبة=يرسم ليها مستقبل
شگ درب النصر للكاس=وجاب المركز الأول
وخل تفرح به كرانة=من قاصيها للداني

الفريق الأول اتكامل=وأسّس للملاعب ساس
مهارة وفن وخبرة وذوق=دگّت للنصر أجراس
بالك عنه من وصّل=إلى الديرة ومعاه الكاس
وصارت تهتف الديرة=حلاة الكاس كراني

وامّا الجانب العلمي=إليه ناسه وإليه فنّه
حقق هالسنة مركز=ووصيف الأول اتدنّى
عدنا اسباع في الكورة=وغير الكورة هم عدنا
وعدنا المركز الأول=وعدنا المركز الثاني