واگف اوگلبه امن الوجد يا حيف مفـري
ينظر الگبر المصطفى والدمـع يجـري

يا جـد انـاْ مطـرود عنـك بالغصيبـة
لو بيدي چان ايكون گبري برض طيبـة
صعبة على المحبوب لو فـارگ حبيبـه
يا جد من افراگك أنـا مكسـور ظهـري



سبطك أنا اللي چنت في صدرك تضمّـه
ساعة تقبّـل منحـره او ساعـة تشمّـه
جارت عليّه اليوم يـا مصطفـى الأمـة
متگوم تنظر على احسينك شاللي يجـري

واحنى على گبـر النبـي يلثـم اترابـه
دمعه يخضّـب لحيتـه او يغسـل ثيابـه
تعبان بو اليمـة بألـم دهـره اوصوابـه
ياليت گبرك صـار يـا مختـار گبـري



يحسين فـت گلبـي كلامـك لا تزيـده
حالك لـو اْن دمعـي يمحبوبـي يفيـده
چان ابدلـه ابلدمـوم يـا روح العقيـدة
يا ليت احط راسك يبو اليمّه اعلى صدري

لكن يبو السجـاد سافـر عـن هلديـارْ
واترك ارموس احبابك او تربة الأطهـار
لو بيدي چان اوياك أرحل يبو الأحـرار
أنذبح جنبـك والضبابـي يحـز نحـري



يحسين حالـك لهّـب النيـران بحشـاي
لولا الگضا ضميت جسمك يبنـي ويّـاي
مكتوب الك تنذبح وانتـه ظامـيّ المـاي
مكتوب الك من عالم الذر هاللي يجـري