الهنا ابميلاده حط
والفرح بيه انتشط

اليوم ميلاد الإمامة
وبالسما الفرحة علامة
هذا مولود الكرامة
بالهنا ميلاده حط

اليوم ليلتنا وناسة
رفع بيها المحب راسه
وهجر كل ناعس نعاسه
وبين روض الشعر نط

يا فؤادي اليوم غرّد
واستعد گرب الموعد
هذا ما هوّه أي مولد
مولد ابهيبته اختط

مولده ابّيت العبادة
وهذي ليه أكبر شهادة
هالشي خارق إلى العادة
ابقلم الله انكتب خط

الجمال أگبل يحبه
وشافه حگ الكعبة كعبة
سووا حگ هالبدر شبّة
والحسود ابعينه بط

اسم الله عالوجنة البهية
وعلى الطلعة الهاشمية
من حسد شر البرية
واللي بالتعقيد شط

باي وصُف لو ردت اوصفه
من زكا للدين عرفه
خلني بالأول اعرفه
حتى متكلّم ابخبط

هذا حيدر أبو العترة
اللوذعي صاحب القدرة
الأريحي زاكي الفطرة
الماسجد حگ صنم قط

أبوه زاكي وزاكية امّه
بيت عزة وهيبة ضمه
فرِد بين الأمة أمة
طار فوگ العز وحط

آية الله وفيه سرّه
وبيه حرّك هالمجرّة
وصارت الوادم ابفكره
امدودهة في خبط ولبط

يا علي جيتك ابهمي
ابهلحفل ارد اسجْل اسمي
وابغي يوم الحشر تحمي
شاعرك من أذى اشتط

ياللي حبه آي منزل
ابروضة فيها العشگ مشتل
آنه في علياك جدول
وانت يا مولاي شط