|
نذرت عمري إلين يشيلني الشيال .... وتحملني على أعناقها لرجال
وتمشي الناس خلفي .... وفي عواطفهم أشكال أشكال
ناس تقول ريحنا وهوه إرتاح .... وناس تقول ولى وراح
وناس قلوبها تنزف وجع وجراح .... وناس تندب وناس تنادي بولوال
مهما فلان شال أثقال في قلبه .... ومهما فلان سوّى وقال
نذرت عمري بهالماتم .... وكل ماتم .... أوقف وانشد الموال
بآل المصطفى اتغنى .... بموالدهم واترقب واتمنى
شفاعتهم وساطتهم الى الجنة .... ولا أخشى اللومه واسمع المنّه
وكلي ذنوب .... ومنهو ما عليه بهالحياة ذنوب
من معصوم .... من ما يرتكب جنحه .... من ما يبتلي بغيبه وقيل وقال
نذرت عمري .... وهبته بخدمة المختار ويّا الآل
ويومٍ كنت ولد الخمسه والعشرين ... إلين الحين ... أظني العمر قارب يوصل الخمسين
وأنا لا زلت أتشرف بخدمتكم وخدمتهم .... واشارك ضمن محفلكم ومحفلهم
أنا أوياكم عسى ننال الرضا منهم .... وعسى نحظى بوساطتهم
لأنهم ما أحد أحسن .... ولا افضل ... ولا أكرم ... ولا أنبل ... ابد منهم
ولأنهم منتهى الآمال .... وبيهم تنقبل الاعمال ....
أكمل ليك وتسمعني .... بس ياخوي ساعدني .... وصل اعلى النبي والآل ....
،،،،،،،،،،،،،،،،،،،،،،،،،،،،،،،،،،،،،،،،
نذرت عمري .... وعمري ضاع .... وحسن الخاتمة تمنيت
وقلت ان شا الله وياليت .... يبني ليه الباري وليكم في نعيمه بيت
لأنكم يالحبايب كلكم موالين .... ووياكم انا واليت .... عترة احمد الهادي
وحيدر غوث لمنادي .... وفاطم والحسن وحسين وآل البيت
بس لازم على خطهم يكون نسير .... ولا ينتابنا تقصير ولا مغالات أو تكفير
أو تشويه أو تزوير .... ولا حش في الأوادم والقصد تسقيط او تحقير
ولازم نلتزم الأخلاق والطيبه .... ويكون الراي واضح عدل كل الناس تدري به
ولا نغتاب ونتهم غيرنا بغيبه .... ولا نتابع أقوال الشك والريبه
ونصفي النيّه ويّا الناس .... ونتباعد عن الوسواس والخنّاس
ولا نحارب بعضنا ونحتمل أثقال .... ونصبح موقع التقصير والإشكال
ولا نبني على موقف عشان فلان قال وقال .... أنا وياك
وكل هاي الجماعه إمعاك .... مدام الحق معك الله ورسوله أويّاك ..
وعشان نصير كلنا مرجله وابطال ... حط ايدك على ايدي .... وصل اعلى النبي والآل
حسن القرمزي
رمضان المبارك 1426 هـ
|
بحث
الأعضاء
التقويم
مساعدة
إغلاق نافذة خيارات الموضوع
