يجدي الأمة خانت ما وفتني
غدرها زلزل اركاني وفتني
وگلت ليها علَي كيدي وفتني
وشوفي العاقبة لچ لو إليّه

مع بيعتك مابارت تجارة
يمن دمع العرش لجله تجارى
اشلون الدعي بنعاله تجارا
وداس اضلوع حيدر والزچيّة؟!!

صفت أجسادنا امن الهضم هزّل
بعد ماركّبونا فوگ هزّل
ودخلنا الشام واهل الشام هزّل
وسوّوا عيدهم بعظم رزيّة

من ضرب وشتم يحسين عدنا
ولك أگسى خبر ياخوي عدنا
ما نگدر نگوله گوم عدنا
تلاگي العدد ما يحوي رقيّة

يخوية ايزيد ما ينسّى او شامه
ترك في گلبي من لحزان شامه
يويلي من نظر راسك او شامه
أو ظل ايكسّر اسنونك يخوية

أبد هالدمع يالمظلوم جاري
صفيت الحزن في كل محل جاري
صعب ما ينوصف هالعلَيْ جاري
محن أهونهاْ يا خوية المنيّة

يجدي أمتك ما هي وفيّة
يليت اتشوف ويش اعملت فيّه
إليّه اظلال ما خلّت وفيّة
وبعدك سوّت افراشي الوطيّة