يليث الغاب جاوبني = جاوبني يليث الغاب
يداحي الباب أني زينب = أني زينب يداحي الباب

يبوية اشلون أنفاسك = تروح وتبگى أنفاسي
يليت اللي فضخ راسك = من گبلك فضخ راسي
ولا اتعوف أهلك وناسك = يا بعد أهلي وناسي
ذاب الگلب جاوبني = ذاب الگلب والله ذاب

گبل أيام بتعيّد = شماتة الشام گبل أيام
يبو الأيتام لا ترحل = لا ترحل يبو الأيتام
على الإسلام من بعدك = سلام الله على الإسلام
يباء البسملة بسمك = الأعظم جاوب الأحباب

فتح عينه ابحنان وشاف = راس ابنيته ابصدره
مسح راس العقيلة بيد = ويد اتغطي الطبرة
وگال الها ابضعيف الصوت = يبنتي كفي العبرة
وذخري الدمع حگ امصاب = مثله ما يصير امصاب

يبنتي چني بالعاشر = أشوفه هالوكت ماثل
واشوف اللي فضخ راسي = بيفضخ راس ابوفاضل
واللي مني يتمكم = بخليكم بلا كافل
ولعين اللي بيرمي الجود = حرم ليتام من لجراب

وأما حسين يا زينب = ما تنوصف أحواله
كأني ابسهم لمثلث = بيوگع وسط دلاله
واما صدره الطاهر = بيدوسه الشمر بنعاله
وتالي اعليچ يا بنتي = تغير الخيل بالأطناب

يبنتي رحمة من ربي = اصطفتني من گبل ما شوف
زينب كعبة العفة = وجهها تستره ابلچفوف
مسبية إلى الكوفة = وإلى الشامات من لطفوف
والله دخلت المجلس = أشد من ضربة المحراب