أم البنين اتصعّد انفاس المنيّة=وتحاچي الحورا وعبرتها جريّة

بعدي يزينب على امصابچ گلبي مألوم=وكل يوم سمعي ايهيجه ذكر حسين كل يوم
وطول الحياة الحزن كله على المظلوم=ويلي على المظلوم كل صبح ومسية

من يوم عاشر واني متصوّب افّادي=ابجرحين گلبي منهم امألّم وصادي
واحد لفگد حسين والثاني لولادي=وحسين اشد فگده من اولادي عليّه

من يوم عاشر واني متصوبة ابجرحين=واحد من الأولاد والثاني من حسين
كلما ذكرت امصابهم هل مدمع العين=وانفِجِع كلما سمعت اسم الغاضرية

تمنّيت اموت ابكربلا ويا أولادي=فدوى لتراب حسين سبط النبي الهادي
لكن يزينب كلمن وله يوم غادي=واعظم سعادة الموت ويا ابن الزچيّة

من بعد موتي يا حزينة جهزيني=وبتربة حسين الشفية حنطيني
وبراية العباس ولدي چفنيني=إنچان جبتيها من ارض الغاضرية

وما بين هي ما اتخاطب الحورا الحزينة=والا الگضا نازل عليها بالسكينة
أم البنين الأربعة وفخر المدينة=في حجر زينب تلفظ انفاس المنية

وتهيّأت حگ الگضا ومدّت الرجلين=واسبلت إيديها الجليلة وغمضت العين
ورتّلت آيات الختام وحوّل البين=وفاضت الروح وراحت الجنة العلية

وزينب اتنادي آه راحت أم لولاد=وخلّت عليها الگلب بالأحزان وگّاد
گوم ابعجل خلنا انشيعها يسجاد=والله ايصبرنا على هذي الرزيّة