سارة ابنيتي الوردة=گمر وسط الحشا عالگ
گعدت صوبي وگالت=يبابا اشفيك متضايگ

سارة
يبابا مو على العادة=أشوفك جالس ومهموم
خبرني اللي في گلبك=وويش الذي فيه ايحوم
كأنك بابا متكدر=وهذا ما يصح معلوم
ولأني ماني متعودة=أشوفك بابا متضايگ

أبو سارة
يسارةْ عمري تركيني=اوبالچ لا اتشغلينه
ضيگي من هل الدنيا=وفعايلها اللي مو زينة
فيها مخوخ متهرية=وين اتجيها من وينه
المرض مو راضي يتركها=وعليها امعچم ولاصگ

يبنتي ناس فيها اطيور=وكل شي تحسبة طيرة
نگاصة فهم ما تنلام=ونشوة فكر مسكورة
أكلم ناس سكرانين=بلا خمرة وبلا بيرة !
حد ما يفهمون اگشور=لبها امضيّع ونافگ

سارة
يبابا ابتتعب اوياهم=خلهم لا ايتعبونك
بتگعد تكتب وتكتب=لوادم ما يفهمونك
بتدوّخ أصابيعك=وبتضعّف لك اعيونك
بتكتب لكن ابتسمع=يا بابا حچي مارگ

أبو سارة
يبنتي ليش أخليهم=وأتنازل عن اشعاري
ما لي كار أبد فيهم=ولا ايهزون أفكاري
شسوي والجهل سمه=غدا بعگولهم ساري
والنية خبز بايت=صاير بالعفن لازگ

سارة
طيب گول يا بابا=ويش الحل مع ذيله
إذا واحد عوج فهمه=عليك وبصبص ابذيله
وواحد فهمه بالمگلوب=عندك ليه من حيلة !
ترى بين الغلط والصح=يبابا وشكثر فارگ

أبو سارة
يسارة البابا ما يحتاج=حيلة ابمطلبه تنهض
أبكتب والذي ابيبرى=يبرى والذي ابيمرض
يلهم من ضعف عگله=ومن سقم الفهم يلهض
أباغرد ابأشعاري=وخلّه يگعد ايناهگ

قصيدة رائعة فعلاً

والله يخلي لك بنتك الكتكوتة الحلوة سارة