الفقرة الأولى

حزنه لاهب---وگلبه ذايب---ينظر ابجنب النهر متوسّد اعضيده
يبدي لعتاب---آه يلحباب---تتركون حسين حاير يصفگ ابإيده
يعاتب بولفضل---متنهض يا بطل---عزمي گوّض

أبگى وحدي- منهو عندي-يحمي اخيامي إذا دارت عليها الگوم
عزي گوّض- مگدر انهض- وحدي أتحمّل وگاسي شدّتي ابهاليوم
انفلّت شوكتي---وطاحت رايتي---منهو ينهض

تاهت=أفكاره في طف كربلا
ينظر=باچر نساه ابهالفلا
وجتّه=زينب تنادي معولة

زينب=حملت رضيعه المندهش
گالت=عاين رضيعك بالعطش
جسمه=صاير يخويه يرتعش

اصغيّر=عاين ظماه وشاهده
اخذه=يمكن يروّونه العدا
خويه=ولاهب فؤاده برّده

شال طفله حسين واگبل يخاطب هالعدى
الذنب مني لو هو ذنب منّه سدى
يابس السانه دشوفوه وإيده امّدده

غارت اعيونه يويلي وذاب امن الظما
جفّت ادموعه ولهيب الظما ابگلبه حمى
ما حد ايعاين لحاله ولا حد يرحمه

جاوب الگوم ابسهامه بعد ما ينتظر
وانبعث سهم المنيّة من ايدين الأشر
سدّده للولد صابه وشگ منّه النحر

أخذ من دمّه الهمى---رافعنّه للسما--- يشكي أمره
والولد ينظر إله---چنّه عينه اتسايله---بويه گطرة
وعين ابو اليمّة اشبحت---وبمدامعها اسفحت---فوگ نحره
ينظره وحزنه احتدم---شاله راجع للخيم---فوگ صدره

تنهمل دموعه=واعلى الصدر رضيعه
وصّل ابصغيره ونادى ابحريمه
وطلعن الحراير=گالن ويش اللي صاير
شاهدو وليهم بيده فطيمه
شافوا اللي بيده=منّه انگطع وريده
حالته ورضيعه صعبة وأليمة

وسكنة---أگبلت تنادي---گلبي يابه صادي---جبت---الي الماي
خويه---گللي شنهو أمره---وجبت اليّه گطرة---أبرّد احشاي
گلها---لا تنشدي عنّه---وشوفي اللي منّه---تهمي عيناي

الفقرة الثانية

جسمه دامي---واإمامي---ظل على حر الترب مرمي أبو سكنة
بالترايب-دمّه ساچب---ابكثرة اجروحه امزلزل كربلا اونينه
جروحة نازفة-وعساكر زاحفة-والصوايح

بس تعفر---مهره سدّر---للخيم أگبل وهول الفاجعة ابعينه
جتّه زينب-والدمع صب---يا مهر وينه خليصي گللي في وينه
وگع وينه الذخر---دگللي يا مهر---وينه طايح

جاوب=طاح الولي بالمعركة
جسمه=ما يستطيع ايحرّكه
وحده=ما عنده واحد يدركه

طايح=فوگ الترب حلو الشيم
زينب=يا حرة فزعي له الهمم
نرفع=جسمه ونجيبه للخيم

گالت=من شفِت مشيك منتكس
تعثر=تتحدّث اوياي النفِس
تصهل=گلبي من اعيونك يحِس

وراحت الحورا ونساها ولفن ويا المهر
شافن احسين الشفيّة وعلى صدره الشمر
گالوا يا شمر ارفع السيف ولا اتحز النحر

واگبلت زينب تدافع عن حسين الولي
گالت وگلب المصايب من اللهم ممتلي
يا شمر ترقى بنعالك وصدره تعتلي

جاوب حسين الحزينة ويهل منّه الدمع
خفضي صوتچ يالوديعة بعد لا ينسمع
وعودي الخيمة وخلّيني ما بين الجمع

خيّه زينب درجعي---امن الخدر لا تطلعي---گلبي ذايب
يختي مگدر أنتهض---جسمي بجراحه انبهض---بالترايب
سهم لمثلث أخذ---نصف گلبي بس نفذ---ودمي ساچب
والدهر سدّد إلي---سهم جوره الممتلي-بالمصايب

روحي لجانب الماي=وگولي له شايل الوي
انتهض يعباس أنا الوديعة
گالت انت تدري=أبو الفضل يذخري
يا وسف تعفّر فوگ الشريعة
صابوا منّه راسه=وانخمدت انفاسه
وچفّينه الرويّة صارت گطيعة

ولا حد---ينتهض إليّه---حرمة وشبديّه---ما لي ناصر
أعاين---صيحة اليتامى---وضجة الأيامى---والحراير
أشاهد---جثّتك دميّة---عالغبرى رميّة---وانت عافر
أنادي---يا ليل الرزيّة---خفّف البليّة---آه يعاشر