البقيع ابدفنـة المسمـوم = گلـبـه امن المصيبة ذاب
هامـل دمعتـه وعـنـده = علــى أرض الطفوف اعتاب

أنـا يـا كربـلا ابتربـي = دفنت الحسـن المسمـوم
مـا خلّيـتـه متعـطّـل = على حر الثرى چم يـوم
وغسّلته ابجاري المـاي = ما غسّلته مـن لدمـوم
وساعة دفنتـه حضـروا = عنده أهلـه والأصحـاب

لفاني ابموكـب التشييـع = جنازة ابهيبـة مرفوعـة
جسمه ما هـو امبّضـع = ولا هي امكسّرة اضلوعه
ولا گلبه ابسهـم مرمـي = ومنّـه گطعـة منزوعـة
ولا سبيـوا إليـه نسـوة = ولا حرگوا إليـه اطنـاب

إمامي الحسن من جانـي = فتحت ابگبره ليـه البـاع
بعد مـا أودعـوه أهلـه = ابلحده واحتظـى بـوداع
مـا عاينتـه ايـنـازع = على الغبرا يويلي انـزاع
ولا هي انذبحت ارجالـه = ولا اتعفّر إليه چم شـاب

جهّزته ومن حولــــه = على جسمه الأهـل لمّـة
هـذا ايودعـه وهــذا = يقبّل راســه ويشمـه
ولمّا صـار فـي گبـره = بخّيـت الگبـر بالـمـا
وتحـت لتـراب واريتـه = ما خليته فـوگ اتـراب

گالـت كربـلا اعتـابـك = زيّـد لوعتـي وهـمّـي
وميـحگ لـك اتعاتبنـي = على اللي ابتربتي مرمـي
دفنتـه وفضلـه سوّانـي = جليلة وارتفع به اسمـي
وتعـال وشــوف زوّاره = وزحمتهم علـى الأبـواب

شـوف شـلـون زوارك = يزورون الحسن في خوف
مـاحـد يگدر ايـوصّـل = لگبره وبالسكينة ايطـوف
لـكـن شــوف زواري = شمسوية ابأرض لطفوف
أول مـا يـرى الـزايـر = أعتابـه ايقبّـل الأعتـاب

لا تعتِب يلبقيـع وشـوف = منهو في الفضـل زايـد
گبر مذبوحي في روضـة = ثـراهـا ابذبحـتـه واگد
وگبر مسمومك ابلتـراب = حتى مـا عليـه شاهـد
مو أنـتَ الـذي اتعاتـب = أنـي العندي عليك اعتاب

وگبر مسمومك ابلتـراب حتى مـا عليـه شاهـد