زينب ادموع الألم تجريها= اتعاتب اعلى كربلا او واديها
=================================
كربلا هلت يويلي دمعتي= هاجت أحزاني او زادت حسرتي
بگت ويايه أجرها حسرتي=كل جروحي بالدموع أرويها

شلنا من أرض المدينه بالضعن= او شالت اويانا البلايا والمحن
على آل المصطفى جار الزمن= او سدد اسهامه يويلي اعليها

حاطت أسباع او ضياغم هودجي=بيهم ابوگت الشدايد ألتجي
لو أنادي عندي أولادي تجي= والضعينه مزهره ابواليها

مشى ضعني بالأهل ويا الحرم= والعلم منشور عند راعي العلم
ويصيح لا اتخافي المذله والهضم=هالحراير بالچفوف أفديها

آه لچفوف الوفا هلما بگت= عالنهر يا وسف ليها اتگطعت
زينب امبعد الچفوف اتحيرت=من بعده منهو الــ يحديها

عين عباس الأشوف ابها الدرب=سهم صايبها او منها الدم يصب
عگب عينه تنظر الــ وجهي الغرب= والــ عماها اعوينتي عاميها

من أعاتب من أناشد يخوتي= وينه شباني او كلها عزوتي
كربلا ابواديچ راحت دولتي=إخوتي يا كربلا رديها

كربلا الجاسم عزيز أميمته= ابتربتچ طفيتي والله شمعته
ساعه وحده صار عرسه او موتته=اجروح گلب الثاكله اشيشفيها

كربلا او لكبر علي في‍چ انصرع =بدر كامل من طلع لا ما رجع
ذوب أمه ليلى يوم اللي وگع = بعد لكبر منهو إيسليها

كربلا الشبان كلها امصرعه= والضحايا بالثرى متگطعه
او حالة الرضعان حاله مفجعه= گضت عطشانه او گضى ساگيها

ويش أعدد من مصايب مؤلمه=أشتكي بلواي الــ رب السما
معظم اللي حل عليه معظمه= نفسي ذكرى العاشر إتآذيها

ما أحد ظلي تجرا ينظره= تسمع اسمي او ما تشوفني الورا
مثل خدري بعد ما صار او جرى= زينب او جار الزمان اعليها

والولي خويه ابن حيدر علي = من رجع مهره او خالي امن الولي
والسرج من كافلي او حصني خلي= صحت حالة بو علي وشــ بيها

رحت إليه وياه وأنظر حالته= بالترب مطروح طوح ونته
يا كثر لسهام صابت جثته= او شيبته وسفه ابدما امخضبيها

حال أبو السجاد يا شيعه صعب= سهم لمثلث سطا وسط الگلب
ماي لحسين الشفيه ما شرب=او چبدته نار العطش تكويها

والشمر ما راگب الله ابهالأمر= جرح افادي او حز منه النحر
بعد هالمنظر أبد مالي صبر = العين دمعاتي حمم تجريها

اشلون انسى الأعوجيه من إجت= او صدر أخويه بالحوافر كسرت
فتتت لفاد مني فتتت= أنا أيام العمر مـبغيها

بالبراري رحنا او گايد ناگتي = شمر يضربني من أهمل دمعتي
او راسك السامي تشوفه اعوينتي= تشتكي زينب عساك اتجيها

ويا ذباحك مشينا باليسر= يا عظم لهوال مصعب هالأمر
عالهوازل ما تگلي شالبصر= يا أخو زينب عجب تجفيها

والله عدوانك يخويه لبت = للمگانع بالحرم ما گصرت
روعت كل اليتاما واضربت=بالشمس مطروح ظل حاميها

نسوة الهادي او أمير المؤمنين= إيدخلوها على ابن ازياد اللعين
صار يتشمت ويسبك ياحسين= ظنته آل النبي يمحيها

سفرتي أهوال شفت ابها او شدد= مالي حامي من بلد إلىبلد
لو تصيب اجبال هدت هالشدد= والضلوع امن الحزن تحنيها

خويه ودونه الــ يزيد الطاغيه= او خله دعاتي على الخد جاريه
صار ينظرني اهو والحاشيه=زينب الحره الدهر يبديها

إيزيد زيد لي الرزيه او بلوتي= يضرب أسنانك يعزي او مهجتي
روع أيتامك او جتني تشتكي= آه ليتامي وويلي اعليها

من بعد ضيم الأعادي والقهر = ليتني ميته ولا رحت الأسر
والشمر ويلاه من جور الشمر= زينب اتناديك د انظر ليها

بينت لي كربلا واتذكرت= يوم وياكم يخويه ابها انزلت
عجب من دون الأهل منها اطلعت= واتركت عباس مرمي بيها

خذني وياك الگبر بس محتمل= ليت گبلك حان حيني والأجل
جسمي الــ سافر او گلبي مارحل= العزيزه آنه لا اتخليها

لو أرد لارض المدينه الــ حجرتك=ارتگب يا ابن أمي يمكن جيتك
دوم اتخيل يخويه صورتك=والدهر أبدا فلا يمحيها

ويش أجاوب خويه لو واحد سال= وين أبو الأكبر او عباس البطل
وينه جاسم وينه لكبر شالحصل= او فاطمه بنتك شگولن ليها

بعد فگدك ما أريد أيامي= حزني خلفي والدمع گدامي
لا بچي اعليك الدهر يا الظامي= راحله زينب فلا اتلاگيها
================================