گعدت نص الليل في الخرمس أوحطّيت ايدي على الدريشة..
أوايگ على الگمر اللي صاير شكلات الجحشة اللي توها متسبحه
أوگمنا نتساسر
گلت للگمر النارجيلة جضرانه أوضايگ خلگها
گال چيف عاد من ويش مي امبكّرة اليوم؟!!!
گلت له امبكرة بس الفنر راح ايصب گاز اوصار گاز للحين ماجا
والگدو ويّا النسوان للحين ايهربدون ويدحّون فيه والمنگاش
مسكين ويّاه
يعني النارجيلة ابروحها
طاحت من الگمر دمعة چنها روفة منشطفة من احمارة
اوسمعت اصياحه اللي چنّه صوت عربانه امجيمة اتزايط
أوگال ليّي عگب ما سكت عن لتبنگح
أنا بعد النجمة اللي صوبي ما ادري وين راحت
أوطلب منّي أطالع السما واتأكّد
خليت اعويناتي تتشاطف على المكسي لزرگ اللي كلّه زري
أوشفت كلامه مسمار في لوح
يعني كل فلاف أربع انجوم ويّا بعض
بس الگمر ابروحه چنّه ناطور الگلعة ماحد صوبه
عوّر افّادي الگمر
واني عوّرت افّاده
غازلني
أوصرت رفيگته
أوبنعزم ناس واجد في العرس.

لو يطول الليل أكثر بالسمرْ
أنا ويا النارجيلة والگمرْ
ننشد ايام اللي راحت وانگضت
فيها كان الحب على هام البشرْ
والنفوس اللي يجمعها الهيامْ
كانت اتورود مثل ماي المطرْ
آه يا أيامنا اللي اتصرمت
راحت اوراح اللي من عدناْ صدرْ
كنّا في راحة وابساطة كالخيالْ
مو عن اهموم احنا ياخذنا السهرْ
كنّا نسهر للمحبة او للوصالْ
أو كنّا في العتمة مثل لمّة دُررْ